काठमाडौं । एआईजीमा बढुवा भएका ३ जना अधिकृतलाई प्रहरी महानिरीक्षक शैलेश थापा क्षेत्रीले दर्ज्यानी चिन्ह लगाउँदै गर्दा सर्वोच्चमा सो निर्णय बिरुद्ध रिट दर्ता भएको छ । आईजीपी क्षेत्रीकै ब्याचमेट ईश्वरबाबु कार्कीले वारेस केशव पौडेलमार्फत ल्याएको रिट दर्ता गरिएको सर्वोच्च अदालतका प्रवक्ता बिमल पौडेलले जन प्रहारलाई बताएका छन् ।
अरु दुईजना डीआईजी घनश्याम अर्याल र प्रकाशजंग कार्कीले ल्याएको रिट निवेदन अध्ययन भइरहेको प्रवक्ता पौडेलले बताए । बिहिबार मन्त्रिपरिषद्ले धीरज प्रताप सिंह, बसन्त कुमार पन्त र रविन्द्र बहादुर धानुकलाई एआईजीमा बढुवा गर्ने निर्णय गरेको थियो । सो निर्णय बिरुद्ध ३ एआईजी अदालत गएका हुन् ।
बढुवा सिफारिसमा असन्तुष्टि जनाउँदै ३ जना डीआईजीले यसअघि लोकसेवा आयोग स्थित बढुवा उपर उजुरी सुन्ने समितिमा उजुरी दिएका थिए । तर, सो समितीले चैत १ मा गृह मन्त्रालयका सचिव टेक नारायण पाण्डे नेतृत्वको बढुवा समितीले गरेको बढुवा सिफारिस सदर गरेको थियो ।
त्यसपछि डिआईजीहरु अदालत पुगेका हुन् । बढुवा बिरुद्ध उजुरी गर्ने तिनै जना डीआईजी प्रहरी महानिरीक्षक शैलेश थापा क्षेत्रीका ब्याचमेट हुन् ।
