काठमाडौं । युभेन्ट्सले इटालियन सिरी ‘ए’ फुटबलमा सहज जित निकालेको छ ।
शनिबार राति भएको खेलमा युभेन्ट्सले साम्पडोरियामाथि ३–१ को सहज जित निकालेको हो ।खेलको २३ औं मिनेटमा माया योसिदाको आत्मघाती गोलमा युभेन्ट्सले अग्रता लिएको थियो । ३४ औं मिनेटमा अल्भारो मोराटाले गोल गर्दै युभेन्ट्सको अग्रता दोब्बर पारे ।
८४ औं मिनेटमा साम्पडोरियाका साबिरीले गोल गर्दै खेल २–१ को स्थितिमा ल्याए । त्यसपछि ८८ औं मिनेटमा मोराटाले व्यक्तिगत दोस्रो गोल गर्दै युभेन्ट्सलाई ३–१ को जित दिलाए ।
जितसँगै युभेन्ट्सको २९ खेलबाट ५६ अंक पुगेको छ । युभेन्ट्स चौंथो स्थानमा रहेको छ । पराजित साम्पडोरिया २६ अंक जोडेर १६ औं स्थानमा रहेको छ ।
