नेताहरुले ‘साह्रै अनपपुलर छ, उनलाई पार्टीमा ल्याएर बद्नामी बोक्नु हुँदैन, छोडिदिनुस्’ भनेपछि आफूले धेरै चासो देखाएको कांग्रेस नेता रिजाल बताउँछन् ।
२०७४ सालको स्थानीय निर्वाचनमा मेयरमा निर्वाचित सराबगीले १९ हजार ३९३ मत पाउँदा उनका निकटतम प्रतिद्वन्द्वी नेपाली कांग्रेसका उम्मेदवार अजय द्विवेदीले १९ हजार १९७ मत पाएका थिए । अर्थात सराबगीसँग करिब दुई सय मतले कांग्रेसका उम्मेदवार पराजित भएका थिए ।
तर उपमेयरमा भने नेपाली कांग्रेसकी उम्मेदवार शान्ति कार्की निर्वाचित भएकी थिइन् र उनले मेयर सराबगीले भन्दा पनि बढी मत पाएकी थिइन् । कार्कीले त १९ हजार ६०७ मत पाउँदा उनकी निकटतम प्रतिद्वन्द्वी तत्कालिन समाजवादी फोरमकी पिंकी यादवले १८ हजार पाँच सय ३० मत पाएकी थिइन् ।
त्यसैले सराबगी एमालेमा जाँदा जसपाको भोट घट्ने र आफूलाई सहज हुने कांग्रेसको विश्वास छ । कांग्रेसले भाउ नदिएपछि सराबगी एमालेतिर लागे । पूर्वमन्त्री एवं उद्योगी मोती दुगडमार्फत एमाले अध्यक्ष केपी शर्मा ओलीसम्म पार्टी प्रवेशको प्रस्ताव पुर्याए ।
२०७४ को स्थानीय तह चुनावमा वीरगञ्ज महानगरमा पाँचौं भएको एमालेले मेयरले नै पार्टी प्रवेश गर्छु भन्दा अस्वीकार गर्ने कुरै भएन । व्यापारी समेत रहेका सराबगीका कारण जति भोट थपिन्छ, त्यो उसका लागि लाभ नै हो ।
अघिल्लो साता काठमाडौं आउँदा आफूलाई भेटेर एमाले आउने पक्का गरेका मेयर सराबगीलाई पार्टी प्रवेश गराउन ओली शनिबार वीरगञ्ज पुगे । सराबगीले भनेका छन्, ‘म अर्कै पार्टीमा गइसकेको थिए । पूर्वमन्त्री मोती दुगडजीले बीच बाटोमै समातेर ओलीजीसँग भेटाइदिनुभयो । त्यसपछि एमालेमा आएँ ।’
जसपा नेताहरुलाई सराबगीले पार्टी छाड्दैछन् भन्ने थाहा नभएको होइन । तर मेयरमा निर्वाचित भएदेखि नै पार्टीलाई सहयोग नगरेको र जनप्रतिनिधिको रुपमा गरेको काम पनि सन्तोषजनक नभएकाले रोक्न प्रयास नगरेको पर्साका जसपा नेता प्रदीप यादव बताउँछन् ।
- तीन ‘खेलाडी’ एमालेमा
मेयर सराबगीको प्रवेशसँगै वीरगञ्जको राजनीतिका तीन खेलाडी एमालेमा भेला भएका छन् ।
एमालेले अघिल्लो स्थानीय चुनावमा मेयरको उम्मेदवार बनाएका नेशनल मेडिकल कलेजका सञ्चालकसमेत रहेका बसरुद्दिन अन्सारी अहिले पनि पार्टीमै छन् । तत्कालीन राजपाबाट मेयरमा प्रतिस्पर्धा गरेका राजेशमान सिंह एक महिना पहिले मात्र एमालेमा प्रवेश गरेका थिए ।
उनी महन्थ ठाकुर नेतृत्वको लोकतान्त्रिक समाजवादी पार्टी (लोसपा) छाडेर २८ माघमा एमाले प्रवेश गरेका हुन् । उनी पनि वीरगञ्जको मेयरको उम्मेदवार बन्ने सहमतिमा एमाले प्रवेश गरेका उनी निकटहरु बताउँछन् । सराबगी थपिएपछि भने ३० वैशाखको चुनावमा अरु दलसँग लड्नुअघि टिकटकै लागि प्रतिस्पर्धा गर्नुपर्ने भएको छ ।
एमाले नेताहरु भने सिंहलाई प्रदेशसभा सदस्य र सराबगीलाई मेयरमा उम्मेदवार बनाउने विकल्प देख्छन् । उनीहरुकाअनुसार जसपामा असन्तुष्ट रहेको प्रतिनिधिसभा सदस्य विमल श्रीवास्तवलाई पनि पार्टी प्रवेश गराउने प्रयास भइरहेको छ । त्यसो भएमा व्यक्तिगत भोट भएका तीन नेताको बलमा वीरगञ्जको चुनावी परिणाम आफ्नो पक्षमा पार्न सकिने नेताहरु बताउँछन् ।
ब्यापारिक घरानामा जन्मिएका विजयी सरावगी मेयर निर्वाचित हुनु अघिसम्म वीरगञ्जमा सफल उद्योगी ब्यवसायी थिए । उनी उद्योग वाणिज्य संघको अध्यक्ष समेत बनेका थिए ।
२०६३ को लोकतान्त्रिक आन्दोलनको बेला वीरगन्ज उद्योग वाणिज्य संघको अध्यक्ष थिए । पछि नेपाल उद्योग वाणिज्य महासंघको केन्द्रीय सदस्य पनि बने । २०७४ सालको स्थानीय निर्वाचन हुनुभन्दा ६ महिनाअघि तत्कालिन संघीय समाजवादी फोरममा प्रवेश गरेका थिए ।
