पुष्कर खड्का
रामेछाप । रामेछापको खाँडादेवी गाउँपालिकामा निःशुल्क इन्टरनेट सेवा सञ्चालनमा आएको छ ।
गाउँपालिकाले पालिका अन्र्तगत रहेका सामुदायिक विद्यालय र स्वास्थ्य संस्थाहरुमा निःशुल्क इन्टरनेट सेवा सञ्चालन गरेको हो । नेपाल दुरसञ्चार प्राधिकरण र यरोनेट संग सम्झौता गरी गाउँपालिकाले निःशुल्क इन्टरनेट सेवा शुक्रबार देखी गाउँपालिका भित्र रहेका ७९ वटा सामुदायिक विद्यालय र ३४ वटा सामुदायिक संस्थाहरुमा निःशुल्क इन्टरनेट सेवा सुरु गरेको गाउँपालिकाका अध्यक्ष प्रेमबहादुर तामाङले जानकारी दिनुभयो ।
अध्यक्ष तामाङले दिएको जानकारी अनुसार अप्टीकल फाईबार मार्फत सवै विद्यालय र समुदायिक स्वास्थ्य संस्थामा ब्रोडब्याण्ड इन्टरनेट सेवा जडान गरिएको छ ।
बागमती प्रदेश सभा सदस्य शान्तिप्रसाद पौडेल र गाउँपालिका अध्यक्ष प्रेमबहादुर तामाङले संयुक्तरुपमा निशुल्क इन्टरनेट सेवाको उद्घाटन गर्नु भएको हो । निशुल्क इन्टरनेट सेवाको उद्घाटन कार्यक्रममा शिक्षक महासंघ रामेछापका अध्यक्ष रामबहादुर श्रेष्ठ, उपाध्यक्ष चक्रलाल श्रेष्ठ, सचिव रामकृष्ण श्रेष्ठ तथा विभिन्न राजनीतिक दलका प्रतिनिधिहरुले समेत आधुनिक प्रविधिको युगमा निशुल्क गरिएको इन्टरनेट सेवाले सहयोग पुग्ने बताएका छन् ।
निःशुल्क इन्टरनेट सुवा सञ्चालन पछि सांसद पौडेलले प्रविधिको उचित प्रयोग गरी आफ्नो सेवालाई सुधार गरी प्रभावकारी बनाउन सामुदायिक विद्यालय तथा संस्थाहरुलाई आग्रह गर्नुभयो । त्यस्तै गाउँपालिकाका अध्यक्ष प्रेमबहादुर तामाङले निशुल्क गरिएको इन्टरनेट सेवाले सामुदायिक विद्यलय र संस्थाहरुको सेवा प्रवाहमा राम्रो सुधार हुने विश्वास व्यक्त गरेका छन् ।
