काठमाडौं । प्रधानमन्त्री शेरबहादुर देउवा सत्तासाझेदार दल नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’लाई खुमलटार पुग्नुभएको छ ।
अमेरिकी सहयोग परियोजना मिलिनियम च्यालेन्ज कम्प्याक्ट (एमसीसी)को विषयमा छलफल गर्न प्रधानमन्त्री देउवा बुधबार विहानै दाहालनिवास खुमलटार पुग्नुभएको हो ।देउवाले माओवादीसँग आज निर्णायक वार्ता गर्नसक्ने अनुमान गरिएको छ । एमसीसीमा सहयोग नगरे एमालेसँग मिलेर सभामुख फेर्ने र एमसीसी पास गर्नसक्ने आशंका पनि गर्न थालिएको छ ।
यसअघि नै प्रचण्डले आफ्ना मन्त्रीहरुलाई जस्तोसुकै परिस्थिति आउनसक्ने भएकाले तयारी भएर बस्ने बताइसकेको अवस्थामा माओवादी केन्द्रले सरकार छाड्न सक्ने अर्काथरीको विश्लेषण छ ।
यसअघि २०७६ पुस ४ गते तत्कालिन प्रधानमन्त्री केपी शर्मा ओली खुमलटार पुगेपछि प्रचण्डले सरकारबाट बाहिरिने निर्णय गरेका थिए । पुस ५ गते ओलीले प्रतिनिधिसभा विघटन गरेसँगै प्रचण्ड र माधवकुमार नेपालले आफ्ना पक्षका मन्त्री फिर्ता बोलाएका थिए । त्यसैले पनि आजको भेटलाई निर्णायक भेटका रुपमा लिइएको छ ।
माओवादी केन्द्र र एकीकृत समाजवादी एमसीसीको विपक्षमा उभिरहेको बेला प्रधानमन्त्री देउवाले एमसीसी पारित गर्नका लागि दौडधुप बढाउनुभएको छ । उहाँले मंगलबार बेलुकी प्रमुख प्रतिपक्षी दल नेकपा (एमाले)का अध्यक्ष केपी शर्मा ओलीसँग भेट गर्नुभएको छ ।
भेटमा देउवालाई ओलीलाई एमसीसीमा सघाउन आग्रह गरेका थिए । जवाफमा ओलीले पहिले आफूहरूको माग पूरा गर्न भनेका थिए । एमालेले आफूहरुले कारबाही गरेका १४ सांसदलाई पदमुक्त गर्न माग गर्दै आएको छ ।
