काठमाडौं, । सहिद स्मारक ‘ए’ डिभिजन लिग फुटबलको आइतबार भएको खेलमा जावलाखेल युथ क्लबले हिमालयन शेर्पालाई हराएको छ ।
त्रिपुरेश्वरस्थित दशरथ रंगशालामा भएको खेलमा जावलाखेलले हिमालयनलाई २-१ गोल अन्तरले हराएको हो ।जावलाखेललाई जित दिलाउन रुप बहादुर लामा र ओन्गुना जुनियरले एक एक गोल गरे । हिमालयनका अमृत श्रेष्ठले एक गोल फर्काए । यस जितसँगै जावलाखेल रेलिगेसनबाट जोगिएको छ ।
जावलाखेलले १२ खेलमा १४ अंक जोडेको छ । शेर्पाले १२ खेलमा १३ अंक जोडेको छ । शेर्पा यस अघि नै रेलिगेसनबाट जोगिसकेको छ । यस्तै, दोस्रो खेलमा मनाङ मर्स्याङ्दी क्लब र न्युरोड टिम एनआरटीबीच प्रतिस्पर्धा हुँदैछ ।
मनाङ र एनआरटीबीचको खेल पौने पाँच बजे सुरु हुनेछ । मनाङ ११ खेलमा २० अंक जोडेर दोस्रो स्थानमा रहेको छ । एनआरटी ११ खेलमा १७ अंक जोडेर पाँचौं स्थानमा रहेको छ ।
