काठमाडौं । स्वतन्त्र उर्जा उत्पादक संघ नेपाल (इपान) का पूर्व अध्यक्ष तथा जलस्रोतविद् शैलेन्द्र गुराँगाईले आफैं लगानी नगरी व्यक्तिको जीवनमा समृद्धि नआउने दाबी गर्नु भएको छ ।
संखुवासभा–काठमाडौ जर्नालिष्ट एशोसिएसन (एसकाज) ले मंगलबार काठमाडौंमा गरेको कार्यक्रममा उहाँले जीवनलाई सार्थक र समृद्धितिर डोर्याउन व्यक्ति आफैंले लगानी गर्नु पर्नेमा जोड दिनुभएको हो ।
व्यक्ति, समाज, जिल्ला र देश आर्थिक रुपले सम्पन्न हुन आफैं लगानी गर्ने वातावरण बनाउनु पर्ने उहाँको भनाई थियो । लगानी गर्नको लागि कागजी र कानुनी झन्झट भएकाले सरकारले लगानीमैत्री वातावरण बनाउन, कानुनलाई चुस्त र सरलीकृत गर्दे लैजानु पर्ने उहाँको भनाई थियो ।
जलस्रोतमा लगानी गर्न व्यक्ति स्वःस्फूर्त रुपमा चाहन्छ तर, यसका प्रकृयालाई सरलीकृत गर्नु पर्ने उहाँको भनाई छ । नेपालमा उर्जाको सम्भावना अत्याधिक भएकाले उर्जामा जनता आफैंले लगानी गर्ने वतावरण बनाउनु पर्नेमा जोड दिनुभयो । उर्जामा जनताको पहुँच पुग्न नदिनको लागि विभिन्न तानाबुना रचिने गरेको भन्दै जनता आफैं पनि सजग हुनु पर्ने उहाँको भनाई थियो ।
चिलिमे जलविद्युत आयोजना जनताको स्वःस्फूर्त लगानीमा निर्माण भएकाले त्यसको प्रतिफल पनि रसुवाली जनताले पाएको बताउनुभयो ।
स्वतन्त्र उर्जा उत्पादक संघ नेपालका पूर्व अध्यक्षसमेतरहेका गुराँगाईले जनताको पानी जनताकै लगानी भन्ने सरकारको संकल्प अनुसार उर्जामा लगानी गर्ने बातावरण बनाउन इपानले भूमिका खेल्ने प्रष्ट पार्नुभयो ।
व्यक्तिलाई लगानी गर्ने वातावरण नबनाउन बिभिन्न रणनीति बन्ने गरेको भन्दै उहाँले अरुले गरिदिएको लगानीबाट व्यक्तिमा समृद्धि नआउने ठोकुवा गर्नुभयो । लगानीको लागि विदेशीको मुख ताक्ने प्रवृद्धि हावी भएकाले यसबाट मुक्ति पाउन पनि जनता आफैंले लगानी गर्नु पर्ने उहाँको भनाई थियो ।
