काठमाडौं । नेपाली कांग्रेसका महामन्त्री गगनकुमार थापाले न्यायालयमा देखिएको समस्या त्यहीँभित्र संवादबाट समाधान नगरे कांग्रेसले प्रधानन्यायाधीशले पद छोड्नुपर्ने निर्णय गर्ने बताएका छन् ।
आइतबार गोरखामा आयोजित पार्टी कार्यक्रममा उनले अदालत लामो समयदेखि राम्ररी चल्न नसकेको भन्दै समस्या समाधान नभए कांग्रेसले कठोर कदम चाल्नुपर्ने बताएका हुन् ।
संसद, अदालत र संवैधानिक अंगलाई पंगु बनाइएको अवस्थामा कांग्रेसको हातमा सरकारको नेतृत्व आएको भन्दै उनले यी समस्या समाधान गरेर चुनावमा जानुपर्ने बताए ।
‘संसदलाई पंगु बनाइएको छ, अदालत पंगु बनाइएको छ, संवैधानिक अंगलाई पंगु बनाइएको छ । यस्तो बीचमा कांग्रेसले सरकार चलाएर चुनावमा जाँदा कांग्रेसले केही गर्न सकेन भन्ने प्रयत्न गर्न खोजिएको छ, कांग्रेसले यसलाई चिर्नुपर्छ’ उनले भने ।
