एमाले २०७५ जेठ २ मा फर्किने सन्दर्भमा एमाले चितवनमा विवाद देखिएको थियो । २०७५ जेठ २ मा फर्किदा चितवन निर्वाचन क्षेत्र नं २ का सांसदसमेत रहेका कृष्णभक्त पोखरेल अध्यक्ष हुनुपर्ने थियो ।
सांसद पोखरेल १० बुँदे सहमतिभन्दा अगाडि नै एमालेको मूल प्रवाहमा समेटिसकेका थिए । उनले क्यान्सर अस्पताल भरतपुरको अडिटोरियम हलमा २०७८ बैशाख ११ गते बसेको एमाले चितवनको दोस्रो पूर्ण बैठकमा अध्यक्ष पदसहितको जिम्मेवारी तत्कालिन जिल्ला सचिवसमेत रहेकी नेतृ पार्वती रावललाई हस्तान्तरण गरेका थिए । तथापी नेतृ रावल, २०७७ पुस ५ गतेको संसद विघठन गर्ने तत्कालिन प्रधानमन्त्री केपी शर्मा ओलीको कदमपछि फुट आएको नेकपामा केपी ओली पक्षको जिल्ला अध्यक्ष भएर काम गरिसकेकी थिइन् ।
‘जेठ २ मा फर्किने सन्दर्भमा कुनै समस्या होइन र थिएन, तर तत्कालिन अध्यक्ष स्वंयले नै अध्यक्षको जिम्मेवारी हस्तान्तरण गरेकोले मेरो दावी स्वभाविक रहेको देखिएको हो’ नेतृ रावलले भनिन्, ‘अहिले हामी त्योभन्दा पनि धेरै अगाडि बढेका छौं, सिङ्गो पार्टी एक ढिक्का बनेको छ ।’
बागमती प्रदेशको अन्य जिल्लामा १० बुँदे कार्यान्वयन गर्ने सहमती लागु भए पनि चितवनमा भने विशिष्ट अवस्था देखिएको थियो । एमाले निवर्तमान जिल्ला अध्यक्ष कृष्णभक्त पोखेरलले भने १० बुँदे सहमति कार्यान्वयन भएको सन्देश दिन केही महीनाका लागि मात्रै अध्यक्ष हुने चाहना राखेका थिए ।
पार्टी नेतृत्वकै निर्देशन अनुसार दुई पटकसम्म पार्टीको जिल्ला कमिटीको बैठकको आयोजना पोखरेलले गरे पनि त्यसमा सहमति हुन सकेको थिएन । उनले समाजवादीतिर गएका केही व्यक्तिहरुलाई एमालेकै मूल प्रवाहमा जोड्नका लागि मात्रै आफू अध्यक्ष बन्न चाहेको बताउँदै आएका थिए ।
‘अधिवेशन नजिक आइसक्यो, फेरि १० बुँदेभन्दा सबै संरचनाहरु भत्कने, मनोविज्ञानहरु भत्कने देखिएपछि एकतासहितको नयाँ परिस्थितिमा उभिएका छौं’ पोखरेलले भने, ‘यसले पार्टीलाई थप बलियो र चितवनमा थप शशक्त बनाउँछ भन्ने विश्वास छ ।’
आफू पक्षीय केही नेतालाई जिल्ला कमिटीमा ल्याएपछि निवर्तमान अध्यक्ष पोखरेलले अध्यक्षको दाबी छाडेका छन् । उनी पक्षका नेता प्रकाश ढुंगानालाई बिहीवारको बैठकले जिल्ला उपसचिवमा मनोनयन गरेको छ ।
निवर्तमान अध्यक्ष रहेका सांसद कृष्णभक्त पोखरेल पनि बागमती प्रदेश कमिटी सदस्य बनेका छन् ।
