काठमाडौं – प्रतिनिधिसभा र प्रदेशसभा निर्वाचनपछि लामो समय सत्ताबाहिर रहेको नेपाली कांग्रेसले संघीयता कार्यान्वयनपछि पहिलोपटक प्रदेश सरकारको नेतृत्व गर्दै गण्डकी प्रदेशमा कांग्रेसको झण्डा फहराएको छ ।

गण्डकी प्रदेशको नवनियुक्त मुख्यमन्त्री तथा कांग्रेस संसदीय दलका नेता कृष्णचन्द्र नेपालीले प्रधानमन्त्री केपी शर्मा ओली नेतृत्वको नेकपा एमालेको प्रदेश सरकारका रूपमा पहिलो विकेट ध्वस्त पारेका छन् ।

एमालेका मुख्यमन्त्री पृथ्वीसुब्बा गुरुङलाई पदमुक्त गर्दै कांग्रेस नेता पोखरेल मुख्यमन्त्री बनेका छन् । संविधान र पदीय दुरुपयोग गर्दै केही महिनायता पदमा टिकिरहेका गुरुङले अन्ततः सरकार छाड्नुपरेको छ ।

प्रदेश प्रमुख सीताकुमारी पौडेलबाट संविधानको धारा १६८(५) बमोजिम पोखरेल मुख्यमन्त्री नियुक्त भएका छन् । नेपालीले गण्डकी प्रदेश सभाका बहुमत ३१ सांसदको हस्ताक्षरसहित मुख्यमन्त्रीमा दाबी पेश गरेका हुन् ।

पोखरेललाई नेपाली कांग्रेस, नेकपा माओवादी केन्द्र, जनता समाजवादी पार्टी (जसपा) नेपाल, राष्ट्रिय जनमोर्चा र स्वतन्त्र सांसद दिपक मनाङेको समर्थन छ ।

पोखरेलका बुवा थिए पार्टी सभापति, छोरा बने सभापति हुँदै मुख्यमन्त्री, पढ्नुहोस् इतिहास –

गण्डकी प्रदेशको मुख्यमन्त्रीमा नियुक्त कृष्णचन्द्र नेपाली पोखरेल २०७४ सालको प्रदेश सभाको निर्वाचनमा नवलपरासी पूर्व जिल्लाको प्रदेशसभा क्षेत्र १(१) बाट निर्वाचित भएका हुन् । प्रदेशमा नेपाली कांग्रेसको संसदीय दलका नेता बनेका उनी नेपाली कांग्रेसका पूर्व केन्द्रीय सदस्य समेत हुन् ।

२००५ जेठ ५ गते तनहुँको राम्चे अर्थात् हाल ब्यास–११ मा बाबु गोवद्र्धन शर्मा र आमा द्रौपदा शर्माबाट जन्मिएका पोखरेलको घरमै राजनीतिक पृष्ठभूमि रहेको थियो । पोखरेलका बुवा प्रजातन्त्रका सेनानी गोवद्र्धन शर्मा नेपाली कांग्रेसका केन्द्रीय सदस्य र तनहुँ जिल्ला सभापति रहेका थिए ।

कांग्रेसको १२ औं महाधिवेशनमा लुम्बिनी अञ्चलबाट केन्द्रीय समितिमा निर्वाचित कृष्णचन्द्र नेपाली पोखरेल त्यसअघि २०४८ देखि २०६७ सम्म ४ पटक कांग्रेस नवलपरासीको सभापतिमा रहेका थिए ।

विगत ४ दशकदेखि सक्रिय राजनीतिमा क्रियाशील नेपालीले प्रजातन्त्र पुनर्स्थापनाको लागि भएका आन्दोलनको क्रममा पटक–पटक गरी ३ वर्षभन्दा बढी जेल जीवन बिताएको इतिहास छ ।

२०२२ देखि २०२८ सालसम्म पोखरेलले पिता स्व. गोवद्र्धन शर्माका साथमा भारतमा निर्वासित जीवन बिताएका थिए । राजनीतिक जीवन सँगसँगै पोखरेलले लामो समय काभ्रे फलानटे, तनहुँ दमौली र तनहुँ थर्पुका हाइस्कूलमा राजनीतिशास्त्र, भूगोल, इतिहास विषयको अध्यापन गराएका थिए । पोखरेलले विभिन्न विद्यालयमा प्रधानाध्यापकको भूमिकामा समेत काम गरेका थिए । 

२०३६ सालको जनमत संग्रहमा बहुदलको प्रचारमा सक्रिय भएर नेपाली कांग्रेसलाई विजयी गराएको आरोपमा तत्कालीन मन्त्रिपरिषद्को निर्णयले पोखरेललाई जुम्लाको शिक्षकमा सरुवा गर्ने निर्णय गरेको थियो । २०३६ सालताका पञ्चायती दमन र शारीरिक यातनापछि बाध्य भएर पोखरेलले अन्तिममा शिक्षण पेशा छाड्नुपरेको थियो ।

वकालत पेशामा रहेर नेपाल बार एसोसिएसनको सदस्य समेत रहेका पोखरेलले प्रखर अधिवक्ताको रुपमा समेत गण्डकीमा परिचय बनाएका छन् । जनपक्षीय कानूनी सेवामा समर्पित पोखरेलको सिंगो प्रयासबाट धेरै प्रजातन्त्रवादी राजबन्दीहरु तनहुँ र नवलपरासीका जेलबाट छुटेका थिए ।

राजनीतिक कारणले आफैं शारीरिक यातनाबाट गुज्रिएका पोखरेल एमनेस्टी इन्टरनेसनल नवलपरासीको संस्थापक अध्यक्ष समेत रहेका छन् ।

भारतको दरभंगाबाट बीए उत्तीर्ण उनी त्रिभुवन विश्वविद्यालयबाट बीएड र बीएल समेत पूरा गरेका छन् । 

यस्ता छन् पोखरेलको जीवनका प्रमुख घटनाक्रमहरू –

२०२२ देखि २०२८ – पिता गोवद्र्धन शर्मासँग भारतमा निर्वासित जीवन

२०२९ देखि २०३६ – काभ्रे फलानटे, तनहुँ दमौली र तनहुँ थर्पुका हाइस्कूलहरूमा अध्यापन

२०३५ – विद्यार्थी आन्दोलनमा सक्रिय नेतृत्व

२०३६ – जनमतसंग्रहमा सक्रिय नेतृत्व (तनहुँमा नेपाली कांग्रेस विजयी)

२०३७ – निर्वाचन बहिष्कारका क्रममा जेल चलान

२०४६ – प्रथम जनआन्दोलनका क्रममा जेल चलान

२०४८ – सत्याग्रहका क्रममा जेल चलान

२०४८ – निर्वाचनमा नेपाली कांग्रेस तर्फबाट नवलपरासी–४ बाट उम्मेदवार

२०४८–२०६७ – नेपाली कांग्रेस नवलपरासीको सभापति

२०६२/६३ – दोस्रो जनआन्दोलनका क्रममा जेल चलान

२०६७ – नेपाली कांग्रेसको केन्द्रीय कार्यसमितिमा निर्वाचित

२०७० – संविधानसभा निर्वाचनमा नवलपरासी क्षेत्र ३ मा प्रत्यक्ष तर्फका लागि नेपाली कांग्रेसका उम्मेदवार भएपनि झिनो मतान्तरले हार

२०७४ – प्रदेशसभा निर्वाचनमा गण्डकी प्रदेश नवलपरासी पूर्व १(१) मा निर्वाचित

२०७५ – गण्डकी प्रदेशमा नेपाली कांग्रेस संसदीय दलका नेतामा सर्वसम्मतले निर्वाचित

२०७८ – गण्डकी प्रदेशको मुख्यमन्त्रीमा नियुक्त

तपाईको एक सेयरले थाहा नपाएकाले जानकारी पाउनेछन भने हामीलाई पनि सहयोग पुग्नेछ । कृपया सेयर गरिदिनुहोला। निरन्तर ताजा अपडेटका लागि www.jananewsnepalkhabar.com भिजिट गर्नुहोला।