एजेन्सी । भारतको प्रमुख विपक्षी दल कांग्रेस इन्डियाका नेता राहुल गान्धीले कोभिड संकटको बेलामा प्रधानमन्त्री नरेन्द्र मोदी भ्याक्सिन, अक्सिजन र औषधिजस्तै हराएको टिप्पणी गर्नुभएको छ ।
बिहीबार एक ट्वीट लेख्दै नेता गान्धीले लेख्नुभएको छ, ‘भ्याक्सिन, अक्सिजन र औषधिजस्तै प्रधानमन्त्री पनि हराएका छन् । देखिएको भनेको बस सेन्ट्रले विस्टा, औषधिमा कर र यता–उता प्रधानमन्त्रीको फोटो ।’
कांग्रेसका मुख्य प्रवक्ता रणदीप सुरजेवालले पनि गंगा नदीमा भेटिएको शवको विषयलाई लिएर सरकारको आलोचना गर्नुभएको छ । उहाँले ट्वीट गर्नुभएको छ, ‘नयाँ भारतमा कस्तो समय आयो, अब हुकुमतहरूले लासहरू पनि देख्न छाडिसके… धिक्कार छ !’
विहार र उत्तरप्रदेशको नदीमा पछिल्लो केही दिनदेखि कैयौं शवहरू भेटिएका छन् । स्थानीय पत्रकारले कोभिडबाट मृत्यु भएकाहरूको शव त्यसरी फालेको हुनसक्ने अनुमान गरेका छन् ।
यसै हप्ता विाहारको चौसा प्रखण्डको घाटमा ७१ वटा शव गंगा नदीमा तैरिएको अवस्थामा भेटिएको थियो ।
