काठमाडौं । सोमबार प्रेस स्वतन्त्रता दिवस ‘सार्वजनिक सम्पत्तिका रुपमा सूचना’ भन्ने नाराका साथ मनाइएको छ ।
कोरोनाको प्रभावका कारण भौतिकरुपमा सहभागी भइ कार्यक्रम गर्ने अवस्था नरहेपनि डिजिटल संवाद, छलफल तथा सञ्चारमाध्यममा सामग्री प्रकाशन/प्रसारण गरेर दिवस मनाइएको हो ।
सन् १९९३ मा संयुक्त राष्ट्रसङ्घको साधारणसभाले घोषणा गरेपछि यूनेस्कोको आह्वानमा मे ३ मा विश्व प्रेस स्वतन्त्रता दिवस मनाउन थालिएको हो ।
यसैबीच नेपाल पत्रकार महासंघले कोरोना महामारीका कारण पेशागत सुरक्षाको अवस्था जोखिममा परेको जनाएको छ । महासंघका अध्यक्ष विपुल पोखरेलले कोरोनाका कारण नेपालमा केहि सञ्चारगृह बन्द भएको र सञ्चारकर्मीको पेशगत सुरक्षा जोखिममा परेको बताए ।
उनले नेपालमा सूचनामाथिको पहुँचमा सञ्चारकर्मी भूमिका महत्वपूर्ण रहेको बताए । महासंघका वरिष्ठ उपाध्यक्ष रमेश विष्टले प्रेस तथा स्वतन्त्रताको अवस्था, सञ्चार माध्यम र सञ्चारकर्मीको अवस्था नेपालमा सन्तोषजनक नरहेको धारणा राखे ।
त्यस्तै महासंघका महासचिव रोशन पुरीले श्रम पत्रकार ऐनलगाएतका पेशागत सुरक्षासम्बन्धी कानून कार्यान्वयन गर्न सरकारले हेरचेक्र्याई गरेको आरोप लगाए ।
यसैबीच प्रेस स्वतन्त्रता सूचकाङ्कमा नेपालले ६ स्थान सुधार गरेको छ । रिपोर्टर विदआउट बोर्डरले प्रकाशित गरेको प्रेस स्वतन्त्रता सूचकाङ्कमा नेपाल अघिल्लो वर्ष १ सय १२ औं स्थानमा रहेको थियो, तर यो वर्ष ६ स्थान सुधार गरेर एक सय ६ औं स्थानमा पुगेको छ ।
एक सय ८० देश समावेश रहेको रिपोर्टरका अनुसार छिमेकी देश भारत एक सय ४२ औं स्थानमा छ ।
