काठमाडौं । नेपाल सुपर लिग फुटबलमा फ्रेन्चाइज क्लब धनगढी फुटबल क्लबको कप्तानी किरण चेम्जोङले गर्ने भएका छन् । धनगढीले शुक्रबार विज्ञप्ति निकाल्दै टिमको कप्तानी किरणले गर्ने जनाएको छ ।
राष्ट्रिय टिमका कप्तान समेत रहेका किरण आइकोनिक खेलाडीको रूपमा धनगढीमा आबद्द भएका थिए । पछिल्लो समय भारतको आइ लिगमा पञ्जाबबाट खेलेका किरण ५ वर्षपछि घरेलु फुटबलमा फर्किन लागेका हुन् । धनगढीको मार्की खेलाडी भने विशाल राई रहेका छन् ।
टिमको मुख्य प्रशिक्षकमा युगल किशोर राई र प्रशिक्षकमा तोपे फुजा रहेका छन् । धनगढीले पहिलो खेल आइतबार विराटनगरसँग खेल्नेछ । यसैबीच धनगढी एफसीको मुख्य प्रायोजकको रूपमा दक्षिण कोरियाली कम्पनी किया आबद्ध भएको छ ।
कार उत्पादन कम्पनी कियाले धनगढी एफसीलाई मुख्य प्रायोजकको रुपमा साथ दिएको हो । सम्झौतासँगै कियाले नयाँ लोगो समेत सार्वजनिक गरेको छ । धगढी एफसीका मालिक सुवास शाही र किया नेपालका अनिश लामिछाने सम्झौता पत्रमा हस्ताक्षर गरेका छन् ।
