काठमाडौं, । स्वास्थ्य तथा जनसंख्या मन्त्रालयले कोरोना भाइरसको बढ्दो संक्रमणको त्रासका कारण काठमाडौं उपत्यकासहित ठूला शहरका विद्यालय कम्तिमा एक महिना बन्द गर्न शिफारिस गरेको छ ।
बन्द अवधिमा अनलाइन कक्षामार्फत पठनपाठन गराउन स्वास्थ्य मन्त्रालयले सम्बन्धित सबैलाई भनेको छ । मन्त्रालयले विद्यालयसहित पार्टी प्लालेस, मन्दिर, सिनेमा हल, रात्रिकालीन व्यवसाय पनि बन्द गर्न शिफारिस गरेको छ ।
अहिले देखिएको कोरोनाभाइरस नयाँ भेरियन्ट युवा र कम उमेर समूहमा देखिएको भन्दै स्वास्थ्यमन्त्री हृदयेश त्रिपाठीले चेन ब्रेक गर्न कम्तीमा ३० दिन विद्यालय बन्द गरी पठनपाठन अनलाइनमार्फत गराउन खोजिएको जानकारी दिनुभयो ।
स्वास्थ्य मन्त्रालयमा मंगलबार पत्रकारहरुसँग मन्त्री त्रिपाठीले १८ वर्षभन्दा कम उमेरका लागि भ्याक्सिन नबनेकाले पनि संक्रमण रोक्न विशेष ध्यान जरुरी भएको उल्लेख गर्नुभयो ।
मन्त्री त्रिपाठीले उपत्यकाका मात्र ७/८ लाख विद्यार्थी घरमा बस्दा २० प्रतिशत मोबिलिटी कम हुने भन्दै उपत्यकासहित १५ जिल्लाका ठूला शहरका विद्यालय एक महिना बन्द गर्न सिसिएमसीमा प्रस्ताव गरेको जानकारी दिनुभयो ।
पछिल्लोसमय कोरोना भाइरसको नयाँ प्रकार फैलिएको र यसबाट बालबालिकासमेत उच्च जोखिममा रहेको मन्त्रालयले जनाएको छ ।
नयाँ भेरियन्ट्स एकदम छिटो सर्ने र १८ वर्षमुनिका बालबालिकामा पनि सजिलै सर्ने देखिएकाले विद्यालय क्षेत्र बढी जोखिममा परेको मन्त्रालयको निष्कर्ष छ ।
