काठमाडौं । पछिल्लो समय कोरोना संक्रमित र मृतकको संख्या बढ्दै गएपनि सरकारले तत्कालै लकडाउन नगर्ने भएको छ ।
प्रधानमन्त्रीनिवास बालुवाटारमा सोमबार साँझ बसेको मन्त्रिपरिषद् बैठकले कोभिड—१९ संकट व्यवस्थापन केन्द्र (सीसीएमसी) को सिफारिसमाथि छलफल गर्दै तत्काल लकडाउन नगर्ने र शैक्षिक संस्थाहरु पनि सुचारु राख्ने निर्णय गरेको हो।
यद्यपी स्थानीय तहको स्थिति हेरेर भिन्नाभिन्नै ठाउँका लागि ठोस निर्णय लिने बताइएको छ । तर, भीडभाडयुक्त ठाउँहरुको हकमा स्वास्थ्य सुरक्षाका मापदण्डहरु कडाइका साथ लागू गरिने मन्त्रिपरिषदको निर्णय छ ।
स्रोतका अनुसार कुनै शैक्षिक संस्था बन्द गर्नुपर्ने अवस्था आएका जिल्लास्तरीय जिल्ला कोभिड–१९ नियन्त्रण तथा रोकथाम समिति (डीसीएमसी) ले नै स्थानीय तहको जोखिमको अवस्था हेरेर विशिष्टरुपमा निर्णय लिन सक्ने गरी अधिकार प्रत्यायोजन गरिएको छ ।
संक्रमण फैलन नदिन सचेतना जगाउने र जनतालाई सजग गराउने निर्णय गर्दै मन्त्रिपरिषद् बैठकले तत्कालै लकडाउन नगर्ने निर्णय गरेको एक मन्त्रीले बताए ।
विद्यालयहरु बन्द गर्न सीसीएमसीले सिफारिस गरे पनि सरोकारवालाहरुको रायलाई समेत ध्यान दिँदै तत्कालका लागि शैक्षिक संस्थाहरु बन्द नगर्ने मन्त्रिपरिषदले निर्णय गरेको छ ।
यद्यपी सरकारले विद्यालयमा स्वास्थ्य सुरक्षाका मापदण्डहरु अवलम्बन गर्न भने निर्देशन दिएको छ ।
बालबालिकाहरुमा संक्रमण देखिन थालेको र ११ वर्ष मुनिका बालबालिकाका लागि खोपको प्रबन्धसमेत नभएकाले सतर्क हुनुपर्ने भन्दै प्रधानमन्त्री ओलीले करोनाको बढ्दो जोखिमबारे सजग हुन र रोकथामका उपायहरु अवलम्बन गर्न मन्त्रीहरुलाई निर्देशन दिएका थिए ।
सीसीएमसीले आज पत्रकार सम्मेलनको आयोजना गरी यसबारे जानकारी गराउने तयारी गरेको पनि ति मन्त्रीले बताए ।
