काठमाडौं/ नेपाल कम्युनिष्ट पार्टी (एमाले) का वरिष्ठ नेता एवं पूर्वप्रधानमन्त्री झलनाथ खनालको नेतृत्वमा सांसदहरु प्रधानमन्त्री निवास बालुवाटारमा आयोजना गरिएको संसदीय दलको बैठकमा सहभागी भएका छन् ।
दलका नेता एवं प्रधानमन्त्री केपी शर्मा ओलीले बोलाएको बैठकमा वरिष्ठ नेता माधवकुमार नेपाल र भीम रावल अनुपस्थित भए पनि खनाल भने उपस्थित भएका छन् । बैठकमा खनालसहित सांसद सुरेन्द्र पाण्डेलगायत नेताहरु बालुवाटार पुगेको जनाइएको छ ।
बैठकमा खनालले बोल्नका समय माग्ने, समय दिए आफ्ना कुरा राख्ने र त्यहाँ गएका सांसदहरु हस्ताक्षर गरेर फर्कने बताइएको छ ।
साथै, बैठकमा तीनवटा विषयमा छलफल हुने बताइएको छ । बैठकमा संसद बैठक प्रभावकारी बनाउने, सांसदहरुलाई विकास निर्माणका योजनाहरु पेश गर्ने तरिका सिकाइने र दललाई एकढिक्का बनाउने विषयमा छलफल गरिने बताइएको छ ।
सर्वोच्चले २३ फागुनमा नेकपा खारेज गरी पूर्व माओवादी र एमाले ब्यँताइदिएपछि अध्यक्ष ओली र वरिष्ठ नेता नेपाल र खनालद्वयबीच विवाद भइरहेको छ ।
