काठमाडौं, / नेकपा एमालेका अध्यक्ष केपी ओली र वरिष्ठ नेता माधवकुमार नेपाल पक्षबीच पार्टी कार्यालय धुम्बाराहीमा छलफल भइरहेको छ ।
पार्टी मूख्यालयमा भइरहेको वार्तामा दुबै नेताले आ–आफ्ना पक्षका नेताहरुलाई पनि साथैराखेर भेटवार्ता गर्नुभएको हो ।
नेता माधव नेपालले एक्लै भेट्न नमानेपछि दुबै पक्षका नेताहरुसमेत सामेल भएर भेटवार्त भएको हो ।
सर्वोच्च अदालतले ओली–दाहाल अध्यक्षताको नेकपा खारेज गर्दै एमाले र माओवादी केन्द्र ब्युँताइदिएपछि नेकपामा रहँदा दुई किनारामा पुगेका ओली र नेपालबीच चार महिनापछि भेट भएको हो ।
छलफलमा ओलीका तर्फबाट ईश्वर पोखरेल, विष्णुप्रसाद पौडेल, प्रदीपकुमार ज्ञवाली र सुवास नेम्वाङ हुनुहन्छ भने नेपालका तर्फबाट भीम रावल, सुरेन्द्र पाण्डे, घनश्याम भुषाल, गोकर्ण विष्ट र रघुजी पन्त सहभागी हुनुहुन्छ ।
ओली र नेपालबीच पछिल्लो पटक गत कात्तिक २५ मा भेट भएयता भेटवार्ता भएको थिएन ।
सर्वोच्चको फैसलापछि ब्यूतिएको नेकपा एमालेमा आन्तरिक रडाको मच्चिएका बेला हुन लागेको भेटवार्तालाई महत्वका साथ हेरिएको छ ।
नेपाल पक्षले पार्टीलाई एकढिक्का बनाएर लैजाने हो भने ओली समूहले पछिल्लो समयमा गरेका निर्णयहरु खारेज हुुनपर्ने माग गरिरहेको छ । पार्टीलाई एकीकरणपूर्वको अवस्थामा फर्काउने हो भने नयाँ ढंगबाट छलफल हुन सक्ने यो समूहको निष्कर्ष छ ।
यसअघि प्रधानमन्त्री ओलीले हिजो राष्ट्रपति विद्या भण्डारीसँग भेटवार्ता गर्नुभएको थियो भने वरिष्ठ नेता नेपाल र झलनाथ खनालले माओवादी अध्यक्ष पुष्पकमल दाहालसँग भेटघाट गर्नुभएको थियो ।
