एजेन्सी । अस्ट्रेलिया र न्यूजिल्याण्डबीचको तेस्रो ट्वान्टी–ट्वान्टी क्रिकेट प्रतियोगिता अस्ट्रेलियाले ६४ रनले जितेको छ । जितका लागि २ सय ९ रनको विजय लक्ष्य पछ्याएको न्यूजिल्याण्डले १७.१ ओभरमा सबै विकेट गुमाए खेल अस्ट्रेलियालाई सुम्पिएको हो ।
न्यूजिल्याण्डका लागि मार्टिन गुपटिलले ४३, डेभोन कोन्भे ३८, मार्क चापम्यान १८, ग्लेन फिलिप्स १३ र केली जेमिसनले ११ रन लिए । बाँकी खेलाडीले दोहोरो अंकको रन जोड्न सकेनन् । बलिङतर्फ अस्ट्रेलियाका एस्टोन अगर एक्लैले ६ विकेट लिँदा रिले मिरेडिथले २ विकेट लिएका थिए ।
त्यसअघि टर हारेर पहिला ब्याटिङको निम्तो पाएको अस्ट्रेलियाले निर्धारित २० ओभरमा ४ विकेट गुमाएर २ सय ८ रन बनाएको थियो । उसका लागि ग्लेन म्याक्सवेले ७०, एरोन फिन्चले ६९ र जोन फिलिप्सले ४३ रन बनाए । न्यूजिल्याण्डका इस सोधीले २ विकेट लिँदा टीम साउथी र ट्रेन बोल्टले एक–एक विकेट लिएका थिए ।
न्यूजिल्याण्डको भ्रमणमा रहेको अस्ट्रेलियाको टोलीले पाँचमध्ये तीन खेलको ट्वान्टी–ट्वान्टी क्रिकेट खेलिसकेको छ । पहिलो र दोस्रो खेल घरेलु टोली न्यूजिल्याण्डले जितेको थियो । अब अर्को खेल शुक्रबार दिउँसो ११ः४५ बजे हुनेछ ।
