काठमाडौं,/ राष्ट्रपति विद्यादेवी भण्डारीले नेपालमा कोभिड–१९ विरुद्धको खोप अभियान शुरु भएकामा खुशी व्यक्त गर्दै सबै नागरिकलाई खोपको व्यवस्था मिलाउन सरकारको ध्यानाकर्षण गराउनुभएको छ ।
कोभिड १९ विरुद्धको खोप शुभारम्भको अवसरमा शुभकामना सन्देश दिँदै राष्ट्रपति भण्डारीले विश्वमा कोरोनाविरूद्धको खोप लगाउन प्रारम्भ भएको डेढ महिनामै नेपालले पनि खोप अभियान थालेकामा खुशी व्यक्त गर्नुभएको हो ।
पहिलो चरणमा नै नागरिकलाई खोप उपलब्ध गराउने राष्ट्रको सूचीमा नेपाल पनि सामेल हुन सफल भएकोमा हर्ष व्यक्त गर्दै राष्ट्रपति भण्डारीले कोभिड–१९ महामारीको रोकथाम, नियन्त्रण र उपचारमा अग्रपंक्तिमा रहेका स्वास्थ्यकर्मी लगायत उच्च जोखिममा रहेका व्यक्तिलाई प्राथमिकताका आधारमा खोप निःशुल्क उपलब्ध गराउने नेपाल सरकारको निर्णयको प्रशंसा गर्नुभएको छ ।
सबै नागरिकलाई चरणबद्धरूपमा खोपको व्यवस्था मिलाउन सरकारको ध्यानाकर्षण गराउँदै राष्ट्रपति भण्डारीले खोप लगाएपछि पनि मास्कको अनिवार्य प्रयोग गर्न, एक अर्काको बीचमा कम्तिमा २ मिटरको दूरी कायम राख्न र पटक पटक साबुन पानी वा सेनिटाइजरले हात सफा गर्न सुझाउनुभएको छ ।
खोप अभियानलाई सफल पार्न उहाँले जनप्रतिनिधि, समाजसेवी, सुरक्षाकर्मी, स्वास्थ्यकर्मी, सञ्चारकर्मी लगायत समाजका सबै क्षेत्रसँग अपील पनि गर्नुभएको छ ।
विश्वका सबै राष्ट्रमा खोपको न्यायोचित वितरण समुचित मूल्यमा हुनुपर्दछ भन्ने नेपालको स्पष्ट मान्यता रहेको भन्दै उहाँले कोभिड–१९को विश्वव्यापी महामारीले मानव सभ्यता र विकासलाई चुनौती दिएको पनि उल्लेख गर्नुभएको छ ।
महामारीबाट लाखौँ व्यक्तिले ज्यान गुमाउनु परेको, करोडौँ व्यक्ति प्रभावित भएको र यसको प्रभावबाट हाम्रो देश पनि अछुतो नरहेको भन्दै उहाँले कोरोनाविरूद्ध अग्रपंक्तिमा रहेर सेवा गर्ने डाक्टर, नर्स, स्वास्थ्यकर्मी, सुरक्षाकर्मी, सफाई कर्मचारी लगायत सबैमा आभार पनि व्यक्त गर्नुभएको छ ।
राष्ट्रपति भण्डारीले सन्देशमा भन्नुभएको छ, ‘कोरोना महामारी नियन्त्रण गर्नका लागि भएका वैज्ञानिक प्रयासका कारण प्रभावकारी खोपको विकास भई उत्पादन समेत हुन थालेको छ । यसबाट विश्वभरी नयाँ आशा र विश्वासको सञ्चार भएको छ । खोपको अनुसन्धान तथा विकास गर्ने वैज्ञानिक र खोप उत्पादक देश तथा संस्थालाई नेपालको तर्फबाट धन्यवाद दिन चाहन्छु ।’
