सोलुखुम्बु । खुम्बु पासाङल्हामु गाउँपालिका–१ खार्चेमा प्याराग्लाइडिङको परीक्षण उडान सफल भएको हो । दुई हजार छ सय मिटर अग्लो खार्चेबाट प्याराग्लाइडिङको उडान सुरु गरिएको हो ।
प्याराग्लाइडिङ पाइलट पेम्बा वाङछु शेर्पाले आफ्नै गाउँको आकासमा उडान भर्न पाउँदा खुसी लागेको बताउनुभयो । नेपालको विभिन्न क्षेत्रमा प्याराग्लाइडिङको उडान गर्दै आउनु भएका शेर्पाले सोलुखुम्बुको खरिखोला, वाकु र वाप्सा क्षेत्रमा पनि सम्भावना रहेको बताउनुभयो ।
आन्तरिक तथा बाह्य पर्यटन प्रर्वद्धनको लागि व्यवसायिक रूपमा प्याराग्लाइडिङ सञ्चालनको तयारी भइरहेको वडा अध्यक्ष ङिमादोर्जी शेर्पाले बताउनुभयो । सगरमाथा क्षेत्र लुक्ला नाम्चे जानको लागि सडक मार्गको नजिक पर्ने उक्त क्षेत्रमा पर्यटकको लागि प्याराग्लाईडिङ उपयुक्त हुने वडा अध्यक्ष शेर्पाको भनाइ छ ।
नियमित रूपमा व्यवसायिक प्याराग्लाइडिङ सञ्चालनको तयारी गरिएकाले पर्यटन प्रवर्द्धनमा महत्वपूर्ण टेवा पुग्ने विश्वास पर्यटन व्यवसायीहरूको छ ।
