काठमाडाैँ, आज देशको पूर्वी भूभागमा उत्तरी बंगलादेश र आसपासमा बनेको न्यून चापीय प्रणालीको सामान्य प्रभाव रहेको मौसम पूर्वानुमान महाशाखाले जनाएकाे छ ।
महाशाखाका अनुसार हाल प्रदेश १, बागमती प्रदेश र गण्डकी प्रदेशका पहाडी भूभागमा आंशिक बदली रहेको छ । अन्य भूभागहरुमा मौसम सामान्यतया सफा रहेको र तराईका भूभागहरुमा हुस्सु तथा कुहिरो लागेको जनाइएको छ ।
यसैगरी, आज दिउँसोको मौसमबारे गरिएको पूर्वानुमानका अनुसार प्रदेश नं १, बागमती प्रदेश र गण्डकी प्रदेशमा आंशिकदेखि सामान्य बदली रही बाँकी प्रदेशहरुमा आंशिक बदली रहने महाशाखाले जनाएको छ । यसपटक पानी पार्ने मौसमी प्रणालीको कमीका कारण हिउँदमा वर्षासँगै हिउँ पनि कम परेको छ ।
हरेक वर्षको हिउँदयाममा पश्चिमी वायुको प्रभावका कारण नेपालमा पानी पर्ने र हिमपात हुने गरेको थियो । तर यसपालि पश्चिमी वायुको प्रवेश भए पनि शक्तिशाली नहुँदा फाट्टफुट्ट मात्रै वर्षा भएको छ । पानी पर्ने गरी जलवाष्पयुक्त हावा प्रवेश नगर्दा राम्ररी हिमपात समेत हुन पाएको छैन । पानी नपर्दासम्म प्रदूषण झनै बढ्ने मौसमविद्ले बताउँदै आएका छन् । यस्तै, यो महिनाको मध्यसम्ममा पनि पानी नपरे हिउँदे बालीको उत्पादकत्वमा असर पर्ने कृषि विज्ञ बताउँछन् ।
