ह्वाट्सएपले लागू गरेको नयाँ नियमअनुसार फेसबुकसँग डाटा शेयरको अनुमति दिने नयाँ अपडेटलाई स्वीकार नगरेमा अब ह्वाट्सएप चलाउन पाइने छैन । यद्यपि बेलायत तथा युरोपका अन्य मुलुकहरुका प्रयोगकर्तालाई चाहिँ यो नियम नलाग्ने बताइएको छ ।
आगामी फेब्रुअरी ८ सम्ममा प्रयोगकर्ताले ह्वाट्सएप अपडेट नगरेमा तत् पश्चात् ह्वाट्सएप प्रयोग गर्न पाइने छैन । नयाँ अपडेटसँगै ह्वाट्सएपमा शपिङ र भुक्तानीका फिचरहरु समेत थप गरिएको ह्वाट्सएपले जनाएको छ ।
एनालिटिक्स कम्पनी सेन्सर टावरका अनुसार गत जनवरी ४ अगाडिको एक हप्तामा मेसेजिङ एप सिग्नल २ लाख ४६ हजार पटक डाउनलोड भएकोमा तत् पश्चात्को हप्तामा ८८ लाख पटक डाउनलोड भएको छ ।
त्यसमध्ये भारतमा सबैभन्दा धेरै डाउनलोड भएको पाइएको छ । ह्वाट्सएपमा नयाँ अपडेटको समाचार आउनु अगाडि भारतमा साप्ताहिकरुपमा १२ हजार पटक सिग्नल डाउनलोड हुने गरेकोमा अहिले २७ लाख पुगेको छ । त्यस्तै बेलायतमा ७ हजार ४ सय बाट १ लाख ९१ हजार पटक र अमेरिकामा ६३ हजारबाट बढेर ११ लाखमा पुगेको छ ।
सिग्नलको डाउनलोड अत्यधिक बढेसँगै प्रयोगकर्ताले भेरिफिकेसन कोड प्राप्त गर्न र ग्रुप क्रिएट गर्नमा समस्या उत्पन्न भैरहेको प्रयोगकर्ताले गुनासो गरेका छन् र उक्त समस्या समाधानको पहल भैरहेको सिग्नलले जनाएको छ ।
विश्वका नम्बर वान धनाढ्य एलन मस्कले समेत ह्वाट्सएप प्रयोग गर्न छाडेर सिग्नल प्रयोग गर्न आह्वान गरिसकेका छन् ।
सिग्नलभन्दा टेलिग्राम झनै लोकपि्रय बनिरहेको छ । ह्वाट्सएपमा नयाँ अपडेटको समाचार आउनु अगाडि टेलिग्राम एप विश्वमा एक हप्तामा ६५ लाख पटक डाउनलोड हुने गरेकामा अहिले १ करो८ १० लाख पुगेको छ ।
बेलायतमा टेलिग्रामको साप्ताहिक डाउनलोड संख्या ४७ हजारबाट १ लाख नाघेको छ । त्यस्तै अमेरिकामा २ लाख ७२ हजारबाट ६ लाख ७१ हजारमा पुगेको छ ।
सिग्नल र टेलिग्रामका प्रयोगकर्ताको संख्या तिव्र गतिमा बढिरहँदा ह्वाट्सएपको डाउनलोड दर भने उल्लेख्य मात्रामा घटेको छ ।
यसअघि ह्वाट्सएप औसतमा हप्तामा १ करोड १३ लाख पटक डाउनलोड हुने गरेकोमा हाल घटेर ९२ लाखमा झरेको छ ।
यद्यपि कतिपयले भने ह्वाट्सएपको डाउनलोड दर केही घट्दैमा हालसम्म ५ अर्ब ६० करोड पटक डाउनलोड भैसकेको ह्वाट्सएपलाई ठूलो असर नपर्ने बताउँछन् ।
सेन्सर टावरका अनुसार ह्वाट्सएपका प्रतिस्पर्धी कम्पनीहरुलाई प्रयोगकर्ताको आनीबानीमा परिवर्तन ल्याउनु निकै कठिन हुनेछ । जसका कारण ह्वाट्सएप आगामी दिनमा पनि सबैभन्दा लोकप्रिय मेसेजिङ एपकै रुपमा रहनेछ ।
