एजेन्सी, / प्रिमियर लिग क्लब म्यानचेस्टर सिटी कारावाओ कप (इएफएल) फुटबलको फाइनलमा प्रवेश गरेको छ ।
आफ्नो बलियो प्रतिद्धन्दी क्लबलाई हराउँदै फाइनलमा स्थान बनाउन सफल भएको हो । बुधबार राति भएको दोस्रो सेमिफाइनल खेलमा म्यानचेस्टर युनाइटेडलाई २-० ले पराजित गर्दै सिटी फाइन प्रवेश गरेको छ ।
युनाइटेडको घरेलु मैदानमा सिटीलाई जित दिलाउन जोन स्टोन्स र फर्नान्डिन्होले एक-एक गोल गरे । पहिलो हाफ गोलरहित बराबरीमा सकिएको खेलमा सिटीले दुबै गोल दोस्रो हाफमा गर्न सफल भएको थियो ।
५० औं मिनेटमा स्टोन्सले गोल गर्दै सिटीलाई अग्रता दिलाएका थिए । ८३ औं मिनेटमा फर्नान्डिन्होले गोल गर्दै सिटीलाई २-० को जित दिलाए ।
अब सिटीले उपाधिका लागि २५ अप्रिलमा प्रिमियर लिग प्रतिद्धन्द्धी टोटेनहम हस्टपरसँग प्रतिस्पर्धा गर्नेछ । खेल वेम्वली स्टेडियममा हुनेछ । टोटेनहमले यसअघि च्याम्पियनसिप क्लब ब्रेन्टफोर्डलाई २-० ले हराउँदै फाइनलमा स्थान बनाइसकेको थियो ।
