विराटनगर, / भूमि व्यवस्था, सहकारी तथा गरिबी निवारण मंत्री डा.शिवमाया तुम्बाहाम्फेले संसदीय अभ्यास र अफ्ठ्यारो परिस्थितिमा सरकारले गरेको प्रतिनिधि सभा विघटन संवैधानिक रहेको बताउनु भएको छ ।
सोमबार विराटनगरमा आयोजित पत्रकार सम्मेलनमा बोल्दै मन्त्री तुम्बाहाम्फेले दुई तिहाई नजिकको मत रहेको सरकारलाई पार्टीभित्रैबाट काम गर्न नदिइएपछि जनताको फ्रेस म्याण्डेट लिन निर्वाचनमा जान लागेको धारणा व्यक्त गर्नुभयो । उहाँले निर्वाचनमा जानु भनेको संविधान कार्यान्वयन हुनु र संविधानले गतिशीलता प्राप्त गर्नु भएकाले यसलाई प्रतिगमन भन्न नमिल्ने बताउनुभयो ।
सञ्चारकर्मीले गरेको प्रश्नको जवाफमा उहाँले अदालतमा विचाराधीन रहेको मुद्धाको विषयलाई लिएर आफुले केही नबोल्ने बताउनु भयो ।
डा. शिवमाया तुम्बाहाम्फे, मंत्री, भूमि व्यवस्था, सहकारी तथा गरिबी निवारण मंत्रालय ।
पूर्व उपसभामुख समेत भईसक्नु भएको मंत्री डा.तुम्बाहाम्फेले सभामुखले पदको मर्यादा र गरिमा राख्दै निष्पक्ष र स्वतन्त्र हुनुपर्नेमा पार्टीको निर्देशन अनुसार काम गरिरहेको जिकिर गर्नुभयो । उहाँले संवैधानिक परिषदलाई निकम्मा बनाएर सरकारलाई पंगु बनाउने कार्य भएकाले नयाँ म्याण्डेटका लागि निर्वाचनमा जानुको विकल्प नभएको बताउनु भयो ।
उहाँले अझै पनि पार्टी विभाजन नभएको र एकता गरेर जानसक्ने धारणा राख्नु भएको थियो ।
