लमही क्रिकेट मैदानमा लुम्बिनीले दिएको ५३ रनको सामान्य लक्ष्य प्रदेश १ ले ८.५ ओभर खेल्दै बिना क्षति पूरा गर्यो । प्रदेश १ का लागि कप्तान रुविना क्षेत्रीले अविजित २६ रन बनाइन् भने काजल श्रेष्ठ २२ रनमा अविजित रहिन् ।
त्यसअघि टस जितेर पहिले ब्याटिङ गरेको लुम्बिनीले १४.१ ओभरमा ५२ रन जोड्दा सबै विकेट गुमाएको थियो । लुम्बिनीका लागि नितु भण्डारीले २१ रन बनाउनु बाहेक अन्य खेलाडीहरुले दोहोरो अंकमा रन समेत जोड्न सकेनन् ।
संगिता राई र निग्मा तामाङले २-२ तथा कप्तान रुविना क्षेत्रीले १ विकेट लिइन् ।
प्रतियोगिताको उपाधिका लागि आइतबार एपीएफ र प्रदेश १ बीच फाइनल खेल हुनेछ । विजेताले नगद ५ लाख प्राप्त गर्नेछन् भने उप -विजेताले ३ लाख पाउनेछन् । सेमिफाइनलबाट बाहिरिएका दुई टोली सुदूरपश्चिम र लुम्बिनीले समान २५ हजार प्राप्त गर्नेछन् ।
यस्तै सर्वोउत्कृष्ट खेलाडीले २१ हजार, उत्कृष्ट ब्याटरले १० हजार , उत्कृष्ट बलरले ५ हजार प्राप्त गर्नेछन् ।
