‘सेनाविनाको सेनापतिजस्तै बादल’

काठमाडौं । पूर्वमाओवादी नेता रामबहादुर थापा ‘बादल’ले अन्ततः पूर्वसहकर्मी प्रचण्डको साथ छोडेका छन् ।

सरकारका गृहमन्त्री एवम् नेकपा सचिवालय सदस्यसमेत रहेका उनी प्रधानमन्त्री केपी शर्मा ओलीतिर लागेका हुन् । तर उनको समूहका अधिकांश नेताहरु भने प्रचण्ड–माधव नेपाल समूहमा छन् ।तत्कालीन नेकपा माओवादी विभाजन हुँदा पनि बादलले प्रचण्डको साथ छोडेर मोहन वैद्य ‘किरण’लाई रोजेका थिए । तर पछि उनले किरणको साथ छोडे र प्रचण्डसँग पार्टी एकता गरेका थिए । बादलसहितका पूर्वमाओवादी घटकहरुको पार्टी एकतापछि ‘नेकपा माओवादी केन्द्र’ गठन भएको थियो ।

तत्कालीन माओवादी केन्द्र र एमालेसँग पार्टी एकता भएपछि बनेको नेकपामा बादल समूहले ३४ केन्द्रीय सदस्य पद पाएको थियो । प्रचण्डको प्रस्तावमा बादलले नेकपा सचिवालय सदस्य र गृहमन्त्री पाएका थिए । स्रोतका अनुसार बादलले प्रधानमन्त्री ओलीसँग आफूलाई पार्टीको सहअध्यक्षसहित दोस्रो वरियता मागेका छन् ।

बादल ओलीतिर लागे पनि उनको समूहका प्राय सबै प्रचण्ड–माधव नेपाल समूहमै छन् । बादल समूहका एक नेताले जन न्युज नेपाल खबरसँग भने, ‘उहाँ (बादल) सेनाविनाको सेनापतिजस्तो हुनु भएको छ । हामी प्रचण्ड–माधवतिरै छौं, उहाँ ओलीतिर लाग्नुभयो ।’बादल निकट मानिने लुम्बिनी प्रदेशसभा सदस्य आईपी खरेलले पनि बादलको साथ छोडेको संकेत गरेका छन् । उनले सामाजिक सञ्जालमा लेखेका छन्, ‘बादलजी तपाईंसँग सति जान सकिएन । तपाईंको प्रगति होस् ।’

नेकपा विभाजनलगत्तै बादल समूहका नेताहरुले ओलीको साथ छोड्न दबाव दिँदै आएका थिए । तर सुरुमा निर्णय लिन नसकेका उनी ओली र प्रचण्ड–माधव समूहका दुवै बैठकमा अनुपस्थित हुँदै आएका थिए । तर गएराति र आज बिहान पनि आफू निकटका नेताहरुसँगको बसाइँमा बादलले यतिन्जेल साथ दिएकोमा धन्यवाद दिँदै आफू ओलीतिरै लागेको जानकारी गराएको एक नेताले बताए ।

पूर्वमाओवादीका टोपबहादुर रायमाझी र मणि थापा पनि ओली समूहतिरै लागेका छन् ।

लुम्बिनी प्रदेशसभाका आन्तरिक मामिला मन्त्री कुलप्रसाद केसी ‘सोनाम’ले भने आफूहरु प्रचण्ड–माधव समूहकै बैठकमा सहभागी हुने बताएका छन् । सोनामकी पत्नी तारा घर्ती भने सुरुदेखि नै प्रचण्ड–माधव समूहको बैठकमा सहभागी हुँदै आएकी छन् ।

बादल समूहका देव गुरुङ र पम्फा भुसाल भने सुरुदेखि नै प्रचण्ड–माधव समूहमा खुलेर लागेका छन् ।