काठमाडौं, पुस ५ गते । प्रधानमन्त्री केपी शर्मा ओली शीतलनिवासबाट फर्किनुभएको छ । मन्त्रिपरिषदको बैठकपछि संसद विघटनको सिफारिस लिएर शीतलनिवास पुग्नुभएका प्रधानमन्त्री ओली बालुवाटार फर्किनुभएको उहाँको सचिवालयले जानकारी गराएको छ ।
प्रधानमन्त्रीका प्रेस विज्ञ रामशरण बजगाईका अनुसार प्रधानमन्त्री ओली भर्खर शीतलनिवासबाट बालुवाटार फर्किनुभएको हो ।
उता नेपाल कम्युनिष्ट पार्टी (नेकपा) का नेताहरु अध्यक्ष पुष्पकमल दाहाल ‘प्रचण्ड’ निवास खुमलटारमा जम्मा भएर प्रधानमन्त्रीको पछिल्लो कदमप्रति छलफल गर्नुभएको छ । खुमलटारमा बिहान बसेका नेताहरुले प्रधानमन्त्रीको कदमपछि देखिएको समस्याबारे परामर्श गर्नुभएको अध्यक्ष प्रचण्डका प्रेस सल्लाहकार विष्णु सापकोटाले जानकारी गराउनुभयो ।
बैठकमा वरिष्ठ नेताहरु माधवकुमार नेपाल, झलनाथ खनाल, नारायणकाजी श्रेष्ठ लगायतको सहभागिता रहेको प्रेस सल्लाहकार सापकोटाले बताउनुभयो । आज १ बजेकालागि बोलाइएको स्थायी कमिटी बैठक भने अन्येलमा परेको नेताहरुले बताउनुभएको छ ।
आज दिउँसो १ बजेका लागि बोलाइएको स्थायी कमिटी बैठक बस्ने नबस्ने अन्येलमा रहे पनि अध्यक्ष प्रचण्डसहितका नेताहरु प्रधानमन्त्री ओलीसँग छलफल गर्न बालुवाटार जाँदै हुनुहुन्छ । यसअघि बिहान बालुवाटार पुग्नुभएका अध्यक्ष प्रचण्ड प्रधानमन्त्रीलाई नभेटेरै फर्किनुभएको थियो । सापकोटाका अनुसार अध्यक्ष तथा प्रधानमन्त्री ओलीसँगको परामर्शपछि मात्रै बैठक बस्ने नबस्ने टुङ्गो लाग्नेछ ।
