काठमाडौं, / सत्तारुढ नेपाल कम्युनिष्ट पार्टी (नेकपा) भित्रको विवादका कारण संवैधानिक परिषद् बैठक अवरुद्ध बनेपछि यसलाई अगाडि बढाउन सहज हुने गरेर सरकारले अध्यादेश ल्याएको छ ।
मन्त्रिपरिषद् बैठकको सिफारिसका आधारमा राष्ट्रपति विद्यादेवी भण्डारीले मंगलबार अध्यादेश जारी गरेकी हुन् । राष्ट्रपति कार्यालयका अनुसार उनले मंगलबार दिउँसो उक्त अध्यादेश जारी गरेकी हुन् ।
राष्ट्रपति भण्डारीले नेपालको संविधानको धारा ११४ को उपधारा (१) बमोजिम मन्त्रिपरिषद्को सिफारिसमा संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) अध्यादेश, २०७७ जारी गरेको राष्ट्रपतिको कार्यालयले जनाएको छ ।
आइतबार र मंगलबार बसेको संवैधानिक परिषदमा गणपुरक संख्या पुगेको थिएन । संवैधानिक परिषद्मा सदस्य रहने उपसभामुख पद रिक्त छ । एक जना उपस्थित नहुँदा गणपुरक संख्या नपुग्ने भएकोले अध्यादेशमार्फत सो व्यवस्था हटाएर उपस्थितमध्ये बहुमतका आधारमा निर्णय गरिने उल्लेख गरिएको हो ।
आज विहान प्रधानमन्त्रीले आकस्मिक मन्त्रिपरिषद वैठक राखी अगाडि बढाएको अध्यादेशलाई राष्ट्रपतिले तत्कालै जारी गरेकी हुन् । अब सभामुखको उपस्थिति बिना नै परिषद बैठक बस्ने बाटो खुला भएको छ ।
