पार्टी कमिटीको निर्णयले मात्रै कसैको जिम्मेवारी हेरफेर हुनसक्ने गुरुङले जन न्युज नेपाल खबरसँग बताए ।
नेकपा संसदीय दलका नेता समेत रहेका ओलीले आफ्नो विरुद्धको गुट गतिविधिमा लागेको भन्दै गुरुङको राजीनामा मागेका छन् । तर कुनै व्यक्तिको चाहना र इच्छाका आधारमा लेनदेन गर्ने विषय नभएको प्रमुख सचेतक गुरुङ बताउँछन् ।
उनले भने, ‘पार्टी भनेको संस्था हो, त्यहाँ सामूहिक प्रणाली हुन्छ । पार्टी कमिटीको प्रणालीअनुसार, कसले कुन जिम्मेवारी लिने भन्ने कुरा विधि र पद्धति अनुसार हुने भन्ने तय हुन्छ । जोकोहीको जिम्मेवारीमा फेरबदल भइरहन्छ ।’
वैचारिक तथा राजनीतिक विषयमा भिन्न मत राखेकै आधारमा निषेध गर्ने प्रवृत्ति पार्टीमा देखिएको उनी बताउँछन् । ‘कमिटीको संगठनात्मक निर्णयअनुसार पार्टी चल्नुपर्छ, नेताहरुबीच आपसी समन्वयमा त्यो काम हुनुपर्छ’ गुरुङ भन्छन् । तर, एकाधिकारवादी चिन्तन त्याग्नुपर्ने उनको तर्क छ ।
अहिले पार्टीमा भइरहेको निषेधको प्रवृत्तिले विचार र लाइनको बारेमा समेत बोल्न नमिल्ने अवस्था आएको निष्कर्ष उनको छ । तर, पार्टीलाई लोकतान्त्रिक बनाउने, विधि र पद्धतिका आधारमा चलाउनेबारे बहस हुनुपर्ने उनी बताउँछन् ।
