ग्यास सिलिन्डर आगलागी हुँदा पाँच घाइते पेप्सीकोला !
राजधानीको पेप्सीकोलाको एउटा घरमा बुधबार साँझ ग्यास सिलिन्डरबाट आगलागी हुँदा पाँच जना घाइते भएका छन्।
महानगरीय प्रहरी वृत्त बानेश्वरका डिएसपी दक्ष बस्नेतले ५ जना घाइते भएको जानकारी दिए।
प्रहरीकाअनुसार दिउँसो साढे ३ बजेतिर कागेश्वरी मनोहरा नगरपालिका-९ हिमालयन टोलस्थित सुनिता कार्कीको घरमा भाडामा बस्नेको कोठामा ग्यास सिलिन्डरबाट आगलागी भएको हो।
‘सुरूमा ग्यास लिक भएकोजस्तो आवाज आएपछि रेगुलेटर अफ गर्न गएका बेला सिलिन्डर एक्कासी आगोको लप्का निस्किएको देखिन्छ,’ महानगरीय प्रहरी परिसर काठमाडौंका प्रवक्ता एसपी सोमेन्द्रसिंह राठौरले भने।
घटनामा परी घाइते भएकामध्ये १ जना बालकलाई कीर्तिपुर अस्पतालमा पठाइएको छ भने अरू चार जनाको पेप्सीकोलास्थित मदरल्यान्ड अस्पतालमा उपचार भइरहेको छ। कीर्तिपुर पठाइएका १२ वर्षीय बालकको मुखमा जलेको छ भने अरूको अवस्था सामान्य छ।
