अवैध रुपमा रक्तचन्दनको कारोबार गरेको आरोपमा ४ जना पक्राउ
महानगरीय अपराध महाशाखा मिनभवनबाट खटिएको प्रहरीले बौद्ध तीनचुलीबाट
अवैध रुपमा रक्तचन्दनको कारोबार भइरहेको भन्ने सूचनाको आधारमा चार जनालाई पक्राउ गरेको छ ।
प्रहरीले बौद्ध तीनचुलीस्थित डमरु फर्निचर कारखानाभित्र रहेको सुनिल तामाङको कोठामा बिक्री गर्ने उद्देश्यले राखेको २१ केजी रक्तचन्दन जस्तो देखिने करिब १ लाख ८६ हजार एक सय ५० रुपैयाँ मूल्य बराबरको दुई वटा मुडा बरामद गरेको छ ।
रक्तचन्दनको कारोबारको आरोपमा पक्राउ पर्नेमा नुवाकोट किस्पाङ गाउँपालिका–५ ठण्डापानी घर भई काठमाडौंको बौद्ध तीनचुली बस्ने २८ वर्षीय ओम बहादुर तामाङ, १८ वर्षीय किशोर, काभ्रे तिमाल गाउँपालिका–८ घर भई ललितपुर पाटन बस्ने २९ वर्षीय कर्नेस तामाङ र सिन्धुपाल्चोक हेलम्बु गाउँपालिका–६ घर भई बौद्ध तीनचुली बस्ने ४२ वर्षीय लाक्पा लामा रहेका छन् ।

रक्तचन्दन कारोबार बारे आवश्यक कारबाहीका लागि जिल्ला वन कार्यालय काठमाडौं पठाइएको महाशाखाले जानकारी दिएको छ ।