बीपी जन्म दिवसमा प्रतिष्ठानको सहयोग:- योद्धा शिव कंगाललाई !
जन न्युज नेपाल खवर प्रतिनिधि काठमाडौँ !
काठमाडौँ / जननायक बीपी कोइरालाको१०७ औं जन्म दिवसको सन्दर्भमा रामेछाप बीपी कोइराला प्रतिष्ठानले प्रजातान्त्रिक योद्धा शिव कंगाललाई आर्थिक सहयोग गरेको छ ।
बुधबार भक्तपुरको कौशलटार स्थित कंगालको डेरा पुगि उनलाई रु. १५१०० आर्थिक सहयोग हस्तान्तरण गरेको प्रतिष्ठानका कोषाध्यक्ष जीवन कार्कीले जानकारी दिनुभयो ।
“प्रजातान्त्रिक आन्दोलनमा लामो समय जेल र प्रवास जीवन बिताएका कंगालको आर्थिक अवस्था दयनीय छ” प्रतिष्ठानका अध्यक्ष रामकृष्ण खड्का भन्नुहुन्छ ” वर्तमान राजनीति विकृति बिसंगतीले पुरिएको छ। जसका योगदानले मुलुकमा ठुला ठुला परिवर्तन भयो उहाँहरुकै अवस्था दयनीय हुनु दु:खद छ । कालो सिसाभित्र सयर गर्ने आलिशान बंगालाका मालिक सम्माननिय , माननीयहरुले विगत भुल्दा देशभरका योद्धाहरुको ठूलो अपमान भएकाले नै हामी शिव कंगाललाई सम्झेर यहाँ आएका हौं ” ।
“तपाईंहरुले मलाई सम्झेर आउनुभयो यो नै ठूलो ठान्छु ” शिव कंगाल भन्नुहुन्छ ” देशमा अहिले राजनीति छैन ब्यापर छ । अपार पैसा बटुल्ने ब्यापार नै राजनीति बन्यो । युवाहरुले त्यसो नगर्नुस् सुधार्नपट्टि लाग्नोस” ।
कंगाललाई आर्थिक सहयोग हस्तान्तरण गर्न नेपाली कांग्रेस रामेछापका सभापति लवश्री न्यौपाने , केन्द्रिय सुचना तथा प्रचार बिभाग सदस्य मधुकर खनाल , नेताहरु बिमल वाग्ने , घनश्याम श्रेष्ठ , नारायण कुमार खड्का , प्रतिष्ठानका महासचिव रत्नहरी ढुंगेल , नेविसंघ जिल्ला अध्यक्ष सुशील अधिकारी , कालिन्चोक फाउन्डेसनका अध्यक्ष दिनेश खड्का लगाएत पुगेका थिए ।
