घोराही । दाङको घोराहीका एक जोडीले क्वारेन्टिनबाट निस्किएलगत्तै वरपिपलको रूखमुनि विवाह गरेका छन् । घोराही उपमहानगरपालिका १८का २३ वर्षीय कृष्ण वली र तुलसीपुर उपमहागरपालिका ७ की २१ वर्षीया सीता चौधरीका बीच आइतबार क्वारेन्टिनबाट निस्किएलगत्तै विवाह भएको हो। परिवारको सल्लाहअनुसार उनीहरूको विवाहमा घोराही १८का वडाध्यक्ष भरत अर्यालले पुरेत बने। कृष्णका अनुसार २ वर्षअघि उनको र सीताको फेसबुकबाट चिनजान भएको थियो।
कृष्ण नयाँदिल्लीको एक होटेलमा सेफको काम गर्थे। सीता तुलसीपुरस्थित गोरखा माविका कक्षा १२ मा पढ्थिन् । चिनजान भएको केही समयमै उनीहरूको माया बस्यो। त्यही मायालाई विवाहमा बदल्न ९ महिनाअघि उनीहरू भागेर भारत गए।
‘९ महिना पहिला भागेर भारत गएका थियौ,’ कृष्णले भने, ‘जेठ १० गते फर्केर आएपछि क्वारेन्टिनमा बस्नु प¥यो । पिसिआर रिपोर्ट नेगेटिभ आएकै दिन विवाह गरेका हौं।’ घर परिवारले आफ्नो अन्तरजातीय विवाहलाई सहजै स्वीकार गरेको र अभिभावककै सल्लाहमा रिपोर्ट नेगेटिभ आएकै दिन समुदायलाई साक्षी राखेर औपचारिक रूपमा विवाह गरेको कृष्णले बताए । वडाध्यक्ष अर्यालले बेहुलाका अभिभावकले छोरा बुहारी ९ महिनापछि घर फर्किएको हुँदा धार्मिक संस्कारअनुसार जेठभित्रै विवाह गर्नु शुभ हुने भनेपछि आफूले पुरेतको काम गरेर जेठ ३२ गते विवाह गरिदिएको बताए ।
‘असारमा छोरा बुहारी विदेशवाट फर्केको दशौं महिना पुग्छ र त्यो धार्मिक संस्कार अनुसार शुभ मानिदैन भन्ने अभिभावकको भनाइ रह्यो,’ वडाध्यक्ष अर्यालले भने, ‘त्यही भए रिपोर्ट नेगेटिभ आएकै दिन अबेर साँझ क्वारेन्टिननजिकै वरपिपलको रूखमुनि बेहुलाका अभिभावक र केही सीमित आफन्तको उपस्थितिमा मैले विवाह गरिदिएको हुँ ।’ उनले वैवाहिक जीवनको शुभकामनाका साथै परिवारमा मिलेर बस्न तथा अभिभावकलाई सम्मानपूर्वक राख्न सल्लाह दिएको बताए । त्यस्तै नवविवाहित जोडीलाई थप १५ दिन होम क्वारेन्टिनमै बस्न आग्रह गरेको समेत उनले बताए ।