काठमाडौँ । सरकारले कोरोना भाइरसको संक्रमणसँग लड्नका लागि धेरै मानिसहरु जमघट हुने सबै स्थानहरुसहित शिक्षण संस्थाहरु बन्द गर्न निर्देशन जारी गरेको छ।
सरकारले अत्यावश्यक कामबाहेक आवतजावत र हिँडडुल नगर्न र २५ जनाभन्दा बढी मानिस भेला नहुन पनि आज बुधबार निर्देशन दिएको छ । त्यस्तै सार्वजनिक सवारी साधनमा सिट क्षमतामा मात्र यात्रु ओसारप्रसार गराउन पनि निर्देशन दिइएको छ । कोरोना नियन्त्रणका लागि उपप्रधानमन्त्री ईश्वर पोखरेलको अध्यक्षतामा बसेको उच्चस्तरीय समिति बैठकले यो निर्णय गरेको हो।
सरकारले युरोपका सबै मुलुकहरु, पश्चिम एसियालगायत खाडी मुलुकहरु इरान, टर्की, मलेसिया, जापानबाट आउने र ती मुलुकका ट्रान्जिट बनाई जुनसुकै मुलुकबाट आउने यात्रुहरुलाई शुक्रबार मध्यरातदेखि लागुहुने गरी प्रतिबन्ध लगाउने निर्णयसमेत गरेको छ ।
बिहीबारदेखि सञ्चालन हुन लागेको एसईई परीक्षा हेल्थ डेस्क स्थापना गरी व्यवस्थित रुपमा सञ्चालन गर्ने तर अन्य सबै शैक्षिक संस्थाहरु चैत मसान्तसम्म बन्द गर्ने निर्णय पनि सरकारले गरेको छ ।