यस्ता छन् नेविसंघको मूल्यवृद्धि विरुद् आन्दोलनको घोषणा :-
काठमाडौं । नेपाल विद्यार्थी संघले सरकारले गरेको पेट्रोलियम पदार्थमा भएको मूल्य विरुद्ध आन्दोलनमा कार्यक्रम घोषणा गरेको छ ।
जनताको आधारभूत आवश्यकता इन्धन, दैनिक उपभोग्य वस्तुको पटक-पटकको मूल्य वृद्धि गरि सरकारले आफ्नो कम्युनिष्ट चरित्र देखाएकोले आन्दोलनमा उत्रनु परेको नेविसंघ महामन्त्री कुन्दन राज काफ्लेद्वारा बिहीबार हस्ताक्षरित विज्ञप्तीमा उल्लेख छ ।
विज्ञप्तीमा नेविसंघले पहिले पनि जनताको हक अधिकारका निम्ति लडेको र अहिले पनि खोक्रो राष्ट्रवाद, जनतालाई बाँडेको झुठा आश्वासन र भ्रमको खेतीबाट चलेको वर्तमान सरकारको सर्वसत्तावादी अधिनायकवाद विरुद्ध लडिरहने जनाइएको छ ।
‘मू्ल्यवृद्धिले सर्वसाधारणको जनजिविका अत्यन्तै कष्टकर भएको छ । यस्तो अवस्थामा नेविसंघ चुप लागेर बस्न सक्दैन’ विज्ञप्तीमा भनिएको छ ।
नेविसंघले जेठ २४ गते देशै भरिका सम्पूर्ण क्याम्पस अगाडि एक घण्टा जक्काजाम गर्ने, २६ गते जिल्लामा मसाल जुलुस, २७ गते देशैभरीका क्याम्पस अगाडि सरकारी संस्थानका सवारी साधन गुड्न रोक लगाउने र २९ गते देशैभरी प्रधानमन्त्रीको पुत्ला दहन गर्ने कार्यक्रम घोषणा गरेका छन।
