कठमाडौँ । नवनिर्वाचित राष्ट्रपति विद्यादेवी भण्डारीले आज पद तथा गोपनीयताको शपथ लिने भएकी छन् । शपथका लागि दिउँसो ४ बजेको समय तोकिएको छ । राष्ट्रपति भण्डारीले प्रधानन्यायाधीश गोपाल पराजुलीबाट शपथ लिनेछिन् ।
संघीय संसद् र प्रदेशसभाका सांसदको तीन चौथाइ मत प्राप्त गर्दै वाम गठबन्धनकी उम्मेदवार भण्डारी राष्ट्रपतिमा दोस्रो कार्यकालका लागि निर्वाचित भएकी हुन् ।
राष्ट्रपति चयनका लागि मंगलबार भएको निर्वाचनमा भण्डारीले संघीय संसद्का २४५ र प्रदेशसभाका ४१५ सांसदको गरी कुल ३९ हजार २७५ मतभार प्राप्त गरेकी थिइन् ।
उनीसँगै राष्ट्रपति पदका लागि उम्मेदवारी दिएकी कांग्रेस नेत्री कुमारीलक्ष्मी राईले भने ७८ संघीय सांसद र प्रदेशसभाका ११६ सदस्यको गरी कुल ११ हजार ७३० मतभार पाइन् ।
