काठमाडौं । अख्तियार दुरुपयोग अनुसन्धान आयोगले पशुपति क्षेत्र विकास कोषका सदस्य सचिव डा. मिलन कुमार थापासहित १४ जना व्यक्ति र २ कम्पनीविरुद्ध भ्रष्टाचारको मुद्दा दायर गरेको छ ।
आइतबार विशेष अदालत काठमाडौंमा मुद्दा दायर गरिएको आयोगका प्रवक्ता राजेन्द्र कुमार पौडेलले जानकारी दिए ।
पशुपति क्षेत्र विकास कोषअन्तर्गत विद्युतीय शवदाह गृहको मेसिन खरिद तथा जडान प्रक्रियामा मिलेमतो गरेर कोषको सम्पत्तिमा हिनामिना र राज्यलाई आर्थिक हानि पुर्याएको भन्दै उनीहरूमाथि मुद्दा दायर गरिएको हो ।
अख्तियारका अनुसार परियोजनामा संलग्न व्यक्तिहरूले नियोजित रूपमा प्रक्रिया मिचेर उपकरण खरिद तथा जडानमा अनियमितता गरेका थिए । यसैका आधारमा उनीहरूलाई भ्रष्टाचार निवारण ऐनअनुसार कारबाही प्रक्रिया अघि बढाइएको हो ।
विशेष अदालतमा दायर मुद्दामा दोषी प्रमाणित भएमा सम्बन्धित व्यक्तिहरूलाई कैद तथा जरिवानाको सजाय हुन सक्नेछ ।
