काठमाडौं । काठमाडौं जिल्ला अदालतमा सहकारी पीडितको पक्षबाट बहस गरेका वरिष्ठ अधिवक्ता दिनेश त्रिपाठीमाथि कुटपिट गरेको आरोपमा थप एक जना पक्राउ परेका छन् ।
हुम्लाको अदानचुली गाउँपालिका-४ घर भइ हाल काठमाडौं सूर्यदर्शन हाइट बस्ने ३२ वर्षीय महानन्द जैसी भनिने महेन्द्र पाण्डेलाई आइतबार प्रहरीले पक्राउ गरेको हो ।
उनलाई टोखाबाट पक्राउ गरिएको जिल्ला प्रहरी परिसर काठमाडौंका एसपी नवराज अधिकारीले जानकारी दिए । पक्राउ परेका उनीमाथि प्रहरीले अनुसन्धान गरिरहेको छ ।
वरिष्ठ अधिवक्ता त्रिपाठीमाथि कुटपिट गर्ने ललितकुमार पक्राउ
यसअघि यही माघ २ गते काठमाडौं जिल्ला अदालत अगाडि सडक पार गर्ने क्रममा त्रिपाठीमाथि आक्रमण गर्ने दोलखाको तामाकोशी गाउँपालिका–१ का ४८ वर्षीय ललितकुमार केसीलाई प्रहरीले पक्राउ गरिसकेको छ ।
अदालतबाट बहस गरी सडक पार गर्ने क्रममा कुटपिट भएपछि वरिष्ठ अधिवक्ता त्रिपाठीलाई प्रहरीले उद्धार गरी सुरक्षित स्थानमा लगेको थियो ।
