काठमाडौं । नेकपा एमालेका अध्यक्ष केपी शर्मा ओलीले सुकुम्बासी बस्ती भत्काउने दुस्साहस नगर्न काठमाडौं महानगरपालिकालाई चेतावनी दिनुभएको छ ।
भूमि अधिकार तथा श्रमिक संगठनले आज काठमाडौंमा गरेको कार्यक्रममा अध्यक्ष ओलीले लोकतन्त्रमा सुकुम्वासीमाथि जथाभावी गर्न नमिल्ने भन्दै उनीहरुलाई आवासको व्यवस्था गर्न महनगरपालिकालाई सुझाव दिनुभयो ।
सुकुम्वासी बस्ती भत्काउने नभई निर्माणको अभियान शुरु गर्नुपर्ने भन्दै ओलीले काठमाडौंका मेयर बालेन शाहलाई सुकुम्वासीमाथि ज्यादति नगर्न चेतावनी दिनुभयो । अरुलाई हेप्न नसकेपछि सुकुम्वासीलाई हेप्ने भन्दै ओलीले मेयर बालेनलाई चेतावनीको शैलीमा प्रश्न गर्नुभयो ।
सुकुम्वासी समस्या समाधान गर्न तीनै तहका सरकार लाग्नुपर्ने भन्दै ओलीले आफूले सरकारसँग पनि यो समस्या समाधानका लागि गम्भिरतापूर्वक छलफल गरिरहेको दाबी गर्नुभयो । सुकुम्बासी बस्तीको एउटा छेउमा ४/५ तले घर लस्करै बनाई दिन पनि ओलीले महानगरपालिकालाई सुझाव दिनुभयो ।
पहिले आफू सरकारमा हुँदा पनि सुकुम्वासी समस्या समाधान गर्न पहल गरेको दाबी गर्दै ओलीले यो सरकारले पहिलेको पहललाई अघि बढाउने जिकीर समेत गर्नुभयो ।
