काठमाडौं । पछिल्लो समय नेपाल विदेशी चित्रकारहरुको पनि गन्तव्यस्थल हुन थालेको छ । नेपालको मौलिक सम्पदाले उनीहरुलाई पनि लोभ्याउन थालेको हो । नौलो नौलो माध्यमबाट कला सृजना गरेर उनीहरुले प्रदर्शनी समेत गर्न थालेका छन् । एक पोर्चुगिज कलाकारले यतिखेर काठमाडौंमा प्रकाशको परावर्तनमा मात्र देखिने नौलो कला प्रदर्र्शनी गरिरहेका छन् ।
‘प्लेटिग्लेम’ एक नयाँ कला माध्यम हो । जुन कला शैलीमा सर्जकले आफनो सृजनामा रेखाचित्र र चित्रकला रंगले कोरेका हुँदैनन् । मध्यरातमा मात्र सृजना गर्न सकिने यो कला प्रकाशको परावर्तनमा मात्र हेर्न सकिन्छ । विश्वमा नै नौलो यो नयाँ कला प्रविधि पोर्चुगलबाट नै शुरु भएको मानिन्छ । यस कलाको सर्जक लोकप्रिय पोर्चुगिज भिजुअल आर्टिष्ट नेल्सन फरेरा हुन् । जसले अहिले पहिलो पटक काठमाण्डौस्थित नेपाल कला परिषदमा आफनो यही नौलो कला प्रदर्शन गरिरहेका छन् । नेपाल मण्डलको मौलिक सम्पदा र पोर्चुगलको बाटलाहा मोनाष्ट्रीको संयोजन गरेर ‘प्लेटिग्लेम’ कला प्रदर्शन भइरहेको छ । कला पारखीहरु पनि उत्सुकताका साथ कला प्रदर्शनी आफनो मोबाइल लाईट बालेर अवलोकन गरिरहेका छन ्। लाइट विना कुनै अर्थ नरहने यो कला उपत्यकाको पुरातात्विक र ऐतिहासिक मठमन्दिरमा राति गएर सृजना गरिएको हो । नेपालको मौलिक कला, संस्कृति प्रेरणाको स्रोत भएको कलाकार फरेराको भनाई छ ।
पोर्चुगलमा शुरु गरेर बेलायत, इटली र बंगलादेश हुदै नेपाल आएर सो कला प्रदर्शन गरिरहेका फरेरा नेपालमा थप उर्जा मिलेको बताउनु हुन्छ । उनको एकल कला प्रदर्शनीको २ लाख बढी कला पारखीहरुले हेरीसकेका छन् । लिस्बनमा फाइन आर्ट्समा उच्च शिक्षा अध्ययन गरेका उहाँले विश्वका अन्य देशहरुमा यस्तो कला सृजना गर्ने र सिकाउने लक्ष्य राख्नुभएको छ । नेपालको मौलिक सम्पदाको संरक्षण गर्न पनि आफनो चाहना रहेको फरेरा बताउनुहुन्छ ।
यो नौलो प्रविधिको कला प्रदर्शनीले नेपालमा विदेशी कलाकारहरुका लागि ‘कला पर्यटन’को पनि विकासको सम्भाव्यता औंल्याएको छ । यसैले विदेशका विभिन्न सर्जक र कलाकारहरुका लागि नेपाल नयाँ आयाम हुन सक्ने भएकोले कला पर्यटनको प्रवद्धनको विषयमा पनि सोच्ने हो की ?
