काठमाडौँ । भारतले उपहार स्वरुप दिएका १५ ओटा मुर्रा जातको राँगा आज नेपाल भित्र्याइँदै छ ।
बुधबार दिउँसो १ देखि २ बजेभित्र नेपालगस्थित रुपैडिया–जमुनाहा नाकामा आइपुग्ने छन् ।
नेपालजंगस्थित पशु क्वारेन्टाईन कार्यालयका प्रमुख डा.विनयकुमार कर्णका अनुसार ती राँगा ट्रकमा ल्याउन लागिएको हो ।
उनले उन्नत जातको नश्ल सुधारका लागि ल्याउन लागिएका राँगाको स्याहारका लागि एकजना भेटेरिनरी डाक्टर पनि सँगै रहेको बताएका छन् ।
उनले आज आइपुग्ने १५ ओटा मुर्रा राँगालाई नेपालगञ्जस्थित पशु होल्डिङ्ग सेन्टरमा एक दिनका लागि राखिने बताएका हुन् । स्वास्थ्य परीक्षण प्रक्रिया पुरा गरेर मात्रै देशका विभिन्न स्थानमा पठाइने उनको भनाई थियो ।
राँगा नेपाल ल्याएपछि विभाग मातहतका राष्ट्रिय पशु प्रजनन कार्यालय “पोखरा, नेपालगञ्ज र लहान” मा राखिने छ ।
राँगाबाट पोखरा, नेपालगञ्ज र लहानबाटै वीर्य उत्पादन गरिनेछ । सोही स्थानबाट वीर्य संकलन र संरक्षण गरिने जनाइएको छ ।
