काठमाडौँ । नेकपा एमालेको शुक्रबार बसेको केन्द्रीय सचिवालय बैठकले विभिन्न निर्णय गरेको छ ।
बैठकले पार्टीका नेताहरुको जिम्मेवारीमा व्यापक हेरफेर गरेको छ । अध्यक्ष केपी शर्मा ओली बाहेक उपाध्यक्ष, सचिव र केन्द्रीय सदस्यहरूको जिम्मेवारी हेरफेर गरेको हो ।ललितपुरको च्यासल स्थित पार्टी केन्द्रीय कार्यालयमा बसेको केन्द्रीय सचिवालयको बैठकले केन्द्रीय नेताहरुको जिम्मेवारी हेरफेर गरेको हो ।
जस अनुसार वरिष्ठ उपाध्यक्ष ईश्वर पोखरेललाई योजना तथा नीति सम्बन्धी विभागको संयोजन गर्ने जिम्मेवारी दिइएको छ । त्यस्तै बैठकले संगठन विभागको प्रमुखमा काशिनाथ अधिकारीलाई जिम्मेवारी दिएको छ ।
उपाध्यक्ष सुरेन्द्र पाण्डेलाई पूर्वाधार र विकास, रामबहादुर थापालाई कृषि तथा उद्यमशिलता, अष्टलक्ष्मी शाक्यलाई सामाजिक विकास, युवराज ज्ञवालीलाई मानव स्रोत, सुवास नेम्वाङलाई सुशासन र सेवा प्रवाह र विष्णुप्रसाद पौडेललाई संगठन प्रशिक्षण र प्रचार सम्बन्धी विभागको संयोजन गर्ने जिम्मेवारी दिएको छ । प्रचार तथा प्रकाशन विभागको संयोजकको रुपमा राजेन्द्र गौतमलाई जिम्मेवारी दिइएको छ । यस्तै एमालेले पार्टी सचिवहरुलाई प्रदेश इन्चार्ज तोकेको छ ।
यस्तै सातै उपाध्यक्षहरुलाई ३२ विभागको जिम्मेवारी दिइएको छ । स्थायी कमिटी सदस्य र पोलिटब्युरोलाई जिल्लाको इन्चार्ज तोकिएको छ भने केन्द्रीय सदस्यहरूलाई महानगर, उपमहानगर, नगर र गाउँपालिकाहरूको इन्चार्जको जिम्मेवारी दिइएको छ ।
बैठकले राष्ट्रपति रामचन्द्र पौडेलबाट प्रमाणीकरण गरिएको नागरिकता बिधेक, टीकापुर घटनाका आरोपी रेशम चौधरीको आम माफी लगायतका बिषयले गम्भीर प्रश्न उठाएको ठहर गरेको छ ।
