काठमाडौँ । राष्ट्रिय स्वतन्त्र पार्टी “रास्वपा”ले उपनिर्वाचन हुने तीनै क्षेत्रमा “क्लिनस्वीप” गर्ने दाबी गरेको छ । शनिबार तीनवटै निर्वाचन क्षेत्रका उम्मेदवार तय गर्दै राष्ट्रिय स्वतन्त्र पार्टी “रास्वपा”ले उपनिर्वाचनमा तीनै सिट जित्ने दाबी गरेको छ ।
राष्ट्रिय स्वतन्त्र पार्टीले चितवन-२ मा सभापति रवि लामिछानेलाई ” तनहुँ-१ मा अर्थविद् डा. स्वर्णिम वाग्लेलाई ” र बारा-२ मा पूर्वएआइजी रमेश खरेललाई टिकट दिएको छ । पत्रकार सम्मेलनमा तीनै उम्मेदवारले सम्बन्धित क्षेत्रमा आफूहरू विजयी हुने दाबी गरेका छन् । उपनिर्वाचन हुने तीन क्षेत्रमा राष्ट्रिय स्वतन्त्र पार्टी “रास्वपाले” “क्लिनस्वीप” गर्ने उनीहरूको दाबी रहेको थियो ।
राष्ट्रिय स्वतन्त्र पार्टीका सभापति रबी लामिछानेले अर्थविद् डा. स्वर्णिम वाग्ले र रमेश खरेललाई हराउने कल्पना पनि गर्न नहुने भन्दै उपचुनावपछि “तीन भाइ” तीनैजना चुनाव जितेर घण्टाघरमा विजय उत्सवमा पत्रकार सम्मेलन गर्ने उद्घोष गरेका छन् । आफ्नो पार्टीले आगामी चुनावमा दुई तिहाइ बहुमतको सरकार बनाउने गरि तयारी गर्ने पनि राष्ट्रिय स्वतन्त्र पार्टी सभापति रबि लामिछानेको दाबी थियो । आफ्नो पार्टीमा अर्थविद् डा. स्वर्णिम वाग्ले र रमेश खरेलजस्ता हजारौँ क्षमतावान् मानिसहरू जोडिने भन्दै रबि लामिछानेले आउँदो चुनावपछि बहुमतको सरकार बनाउने परिकल्पना आफूले गरेको बताएका छन् ।
वाग्ले र खरेलजस्ता विज्ञहरू आफ्नो पार्टीमा आउनु सिंगो देशका लागि उज्यालोको संकेत भएको उनले बताएका छन् । कार्यक्रम हजारौँ क्षमतावान् मानिसहरू जोडिन आँटेको जनाउ घण्टीमात्रै हो । सम्पूर्ण होइन । आज हामी तीन भाइ छौँ । तपाईँहरूको आगमनले हुर्कँदै गरेको पुस्तालाई भरोसा दिएको छ,’ सभापति लामिछानेले भने, ‘निराशाको एउटा ठूलो बादल छाएको ठाउँमा आशाको किरण बालिदिनुभएको छ । एउटा ज्योति बालिदिनुभएको छ । म त्यो दिनको परिकल्पना गरिरहेको छु, जतिखेर हामीले दुई तिहाइको सरकार बनाउने छौँ । तपाईँहरूजस्तो विज्ञहरूले मन्त्रालयहरू हाँक्नुहुनेछ ।
वैशाख १० गते प्रतिनिधिसभाका तीनवटै क्षेत्रमा उपनिर्वाचन हुँदैछ । तनहुँ-१ मा सत्ता गठबन्धनका तर्फबाट गोविन्द भट्टराई उम्मेदवार छन् नेकपा एमालेले सवेन्द्र खनाललाई उम्मेदवार बनाउने निर्णय गरेको छ । चितवन-२ मा नेपाली कांग्रेसका जितनारायण श्रेष्ठलाई उम्मेदवार बनाउने निर्णय गर्दा नेकपा एमालेले रामप्रसाद न्यौपानेलाई उम्मेदवार बनाउने निर्णय गरेको हो ।
बारा-२ मा जनमत पार्टीले शिवचन्द्र कुशवाहालाई उम्मेदवार बनाउने निर्णय गरेको छ भने जनता समाजवादी पार्टीका अध्यक्ष उपेन्द्र यादव र लोकतान्त्रिक समाजवादी पार्टीका वरिष्ठ नेता राजेन्द्र महतो उम्मेदवार हुने तयारी छ । सत्ता गठबन्धन र नेकपा एमालेले उम्मेदवार तय गरेका छैनन् ।
