काठमाडौँ । प्रतिनिधि सभाका सांसद एवं नेपाली कांग्रेसका नेता दुर्लभ थापाले नेकपा एमालेलाई पनि सरकारमा ल्याउनु पर्ने बताउनु भएको छ ।
रफत सञ्चार क्लबमा बुधबार सञ्चारकर्मीहरुसँग कुरा गर्दै सांसद थापाले मुलुकको चौतर्फी विकासका लागि प्रतिपक्ष दल नेकपा एमालेलाई समेत सरकारमा सामेल गरी अगाडि बढ्नु पर्नेमा जोड दिनुभयो ।
देशको ठूलो राजनीतिक दल नेपाली कांग्रेस भएकाले सबै राजनीतिक दललाई मिलाएर लान सकस भएता पनि लामो राजनीतिक अनुभवका आधारमा नेपाली कांग्रेसले राजनीतिक सहमतिलाई नचुकिकन इमान्दारपूर्वक लागू गर्ने उहाँले बताउनुभयो ।
सांसद थापाले सत्ता गठबन्धन दलहरुमा गृह र अर्थ मन्त्रालयको यथाशीघ्र टुंगो लाग्ने र सरकारले चाँडै पूर्णता पाउने उल्लेख गर्नुभयो ।
संघीयताका विषयमा विभिन्न प्रश्नहरु उब्जिरहेका बेला संघीयताको व्यावहारिक कार्यान्वयनलाई पारदर्शीतवरले लागू गर्नेमा नेपाली कांग्रेस अग्रसर हुने उहाँले बताउनुभयो ।
मिटरब्याजी समस्या संघीय सरकारको मात्र नभएर यसलाई प्रदेश र स्थानीय सरकारले समन्वय गरी समाधान गर्नुपर्ने बताउँदै सांसद थापाले यथाशीघ्र संघीय सरकारले यसको समाधानको उपाय निकाल्ने बताउनुभएको छ ।
आर्थिक क्षेत्रमा देखिएको मन्दीलाई दृष्टिगत गरी अर्थतन्त्रलाई चलायमान र गतिशील बनाउन नेपाली कांग्रेस सचेत रहेको बताउँदै थापाले वर्तमान आर्थिक संकटलाई थप बढावा दिने काम राष्ट्र बैकको अर्थ नीतिले गरेको उहाँले आरोप लगाउनुभएको छ ।
आर्थिक अवस्था सुधार गर्न व्यक्तिले थुपारेको धनलाई बैकिङ प्रणालीमार्फत विभिन्न उद्योग, व्यवसायमा लगानीको वातावरण सिर्जना गर्नुपर्नेमा उहाँले जोड दिनुभयो ।
