काठमाडौं । नेपाली कांग्रेसले झण्डै १८ महिनादेखि आफ्नो नेतृत्वको गठबन्धनमा रहेको माओवादी केन्द्रका अध्यक्ष पुष्पकमल प्रचण्डलाई चुनावपछि साथमा राख्न सकेन ।
आलोपालो सरकारको नेतृत्व गर्न सहमत भएका कांग्रेस सभापति शेरबहादुर देउवा र माओवादी अध्यक्ष प्रचण्डबीच को पहिला प्रधानमन्त्री हुने भन्ने विषयमा विवाद भयो ।
आफूलाई प्रधानमन्त्री बनाउन देउवा सहमत नभएपछि प्रचण्डले एमालेसँग गठबन्धन बनाएका थिए । एमाले अध्यक्ष केपी ओलीको समेत समर्थनमा १० पुसमा प्रधानमन्त्री बनेका हुन् । उनले मंगलबार विश्वासको मत लिंदा भने कांग्रेस पनि समर्थन गर्न आइपुग्यो ।
प्रचण्डलाई विश्वासको मत दिने पार्टीको निर्णयबारे टिप्पणी गर्दै कांग्रेस महामन्त्री विश्वप्रकाश शर्माले भनेका छन्, ‘घरजम छँदा प्रेम टुट्यो, डिभोर्स भइसकेपछि माया बस्यो भने जस्तो अवस्था आज संसदमा देखिएको छ ।
पार्टीको संसदीय दलको निर्णयमा महामन्त्रीद्वय गगन कुमार थापा र विश्वप्रकाश शर्मा सहित ५ नेताले भने फरक मत राखेका थिए । आफूहरुको अवस्थालाई भने उनले विम्बात्मक रुपमा सुनाएका छन् ।
‘कुनै जोडीले भागेर विवाह गरिसकेपछि बोलाएर टिकाटालो गर्नुपर्छ या पर्दैन भनेर परिवारका सदस्यहरुको बीचमा फरक मत आउँदो रहेछ । विवाह गरेर गइसकेको जोडीलाई बोलाएर टिकाटालो गर्दै गर्दा सबै सामेल हुनुपर्दोरहेछ’ शर्माले संघीय संसद भवन बाहिर पत्रकारहरुसँग कुराकानीमा भनेका छन् ।
