काठमाडौं । निर्वाचनको पूर्वसन्ध्यामा धनुषाका एसपी वसन्त रजौरेमाथि कारवाहीको तयारी भएको छ । प्रहरी प्रधानकार्यालयले विभागीय कारबाही गर्न मधेस प्रदेश प्रहरी कार्यालयलाई निर्देशन दिएपछि मधेश प्रदेश कार्याललयले एसपी रजौरेमाथि कारवाहीको तयारी भएको हो ।
दाङ स्थायी घर भएका एमाले नेता एवं पूर्वमन्त्री गणेश पहाडीका नातामा ज्वाई पर्ने एसपी रजौरेले मातहतमा राम्रोसँग निगरानी र नियमन गर्न नसकेको आरोपमा उनीमाथि कारबाही गर्न प्रहरी महानिरीक्षक धीरजप्रताप सिंहले मधेस प्रदेशका प्रहरी प्रमुख मसउद आलम खाँलाई निर्देशन दिएको स्रोतको दावी छ ।
प्रदेशस्तरीय सुरक्षास्तरीय गोष्ठी चलिरहेकै वेला गत साता धनुषामा कार्यरत प्रहरी नायब निरीक्षक घुससहित पक्राउ परेका थिए । नगराइन नगरपालिका–२ जटहीस्थित पसलबाट चार हजार घुस लिँदै गर्दा नायब निरीक्षक देवकीलाल चौधरीलाई अख्तियार दुरुपयोग अनुसन्धान आयोगको टोलीले १७ कात्तिकमा रंगेहात पक्राउ गरेको थियो । त्यसवेला गृहमन्त्री बालकृष्ण खाण, गृहसचिव विनोदप्रकाश सिंह, आइजिपी सिंहलगायत उच्च प्रहरी अधिकारी सुरक्षा गोष्ठीका लागि धनुषामै पुगेका थिए । उनीहरु त्यही भएका बेला अख्तियारले छापा मारेको थियो ।
मातहतमा राम्रो कमान्ड गर्न नसकेको भन्दै एसपी रजौरेमाथि कारबाही गर्न सुरक्षा सम्मेलनपछि महानिरीक्षक सिंहले निर्देशन दिएको भएपनि चुनावलाई लक्षित गरेर मात्रै रोकिएको थियो । पछिल्लो केही महिनायता मधेसका सीमानाकामा विकृति बढेको उजुरी प्रहरी प्रधान कार्यालयमा परेको छ ।
उनी रहेका बेला धनुषा लगायतका स्थानमा प्रहरीले घुस मागेको जस्ता उजुरीहरु प्रहरी प्रधान कार्यालयका परेको थियो । प्रहरी प्रधान कार्यालयले धनुषा, महोत्तरी, पर्सा, सर्लाही र सिराहमा पनि निगरानी गर्न मधेश प्रदेश कार्यालयलाई निर्देशन दिएको छ । मधेश प्रदेशका डिआइजी खाँ माथि पनि प्रहरी प्रधान कार्यालयले सुक्ष्मगतिमा निगरानी बढाएको स्रोतको दावी छ ।
