काठमाडौं । काठमाडौंको महाराजगञ्जमा रहेको शिक्षण अस्पतालबाट भागेका कैदीलाई प्रहरीले पक्राउ गरेको छ ।
आँखाको उपचारका लागि बुधबार अस्पताल पुगेका भोला बुढाथोकी हतकडीसहित भागेका थिए । उनलाई ललितपुरको लुभुबाट आज बिहीबार बिहान पक्राउ गरिएको जिल्ला प्रहरी परिसर ललितपुरले जनाएको छ ।
पक्राउ परेका बुढाथोकीलाई जावलाखेलमा राखिएको छ । रामेछापको पिल्पुङ्ग गाउँपालिका–२ घर भएका ३१ वर्षका बुढाथोकी नख्खु कारागारमा ज्यान सम्बन्धी कसुरमा थुनामा छन् ।
उनलाई बुधबार उपचारका लागि त्रि. वि शिक्षण अस्पतालमा लगिएको थियो । कैदी फरार भएलगत्तै अध्ययन गर्न छानबिन समिति गठन भएको छ । प्रहरी उपरीक्षक देवेन्द्रबहादुर पालको संयोजकत्वमा चार सदस्यीय छानबिन समिति गठन गरिएको हो ।
उनी रहेको अनाश्रित कारागार गुल्म नख्खुका कार्यालय प्रमुखलाई जिम्मेवारीबाट हटाइएको र कैदीको सुरक्षामा खटिएका प्रहरी कर्मचारीलाई पनि निलम्बन गरिएको छ ।
