सुर्खेत । सवारी चालक अनुमति पत्र ९लाइसेन्स०को नक्कली प्रवेश पत्र बनाएको आरोपमा सशस्त्रका एक जना जवान पक्राउ परेका छन् । प्रहरीले सोमबार दिउँसो दुई बजेको समयमा सशस्त्रका एक जना जवानलाई पक्राउ गरेको हो ।
पक्राउ पर्नेमा दैलेखको गुराँस गाउँपालिका–४ घर भई हाल सशस्त्र प्रहरी बल नेपाल नम्बर ६ महेश्वरी बाहिनी मुख्यालय सुर्खेतमा कार्यरत ३० वर्षीय सशस्त्र प्रहरी जवान भक्तबहादुर शाही रहेका छन् ।
उनले वीरेन्द्रनगर नगरपालिका–७ मा रहेको यातायात व्यवस्था कार्यालय सुर्खेतमा साउन ११ गते दिएको मोटरसाइकलको सवारी चालक अनुमति पत्रको परीक्षाका लागि नक्कली प्रवेश पत्र बनाएका थिए ।
सशस्त्र जवान भक्तबहादुरले बनाएको लिखित र मौखिक प्रवेश पत्रमा यातायात व्यवस्था कार्यालय सुर्खेतका २ जना कर्मचारीहरूको कृते सहीछाप र कार्यालयको कृते छाप लगाई उत्तीर्ण भएको लाइसेन्स बनाएका थिए ।
उक्त सवारी चालक अनुमति पत्र (लाइसेन्स) लिन आएको अवस्थामा यातायात व्यवस्था कार्यालयका कर्मचारीलाई शंका लागेपछि प्रहरीलाई खबर गरेका थिए ।
यातायात कार्यालयले जिल्ला प्रहरी कार्यालय सुर्खेतलाई खबर गरे पश्चात् प्रहरी टोलीले शाहीलाई नियन्त्रणमा लिई उनीमाथि आवश्यक अनुसन्धान गरिरहेको जनाएको छ ।
