विराटनगर । मोरङको लेटाङ नगरपालिकामा आज पनि कर्फ्यु जारी छ । एक प्रहरीको ज्यान जाने गरी भएको घटना नियन्त्रणमा लिन जिल्ला प्रशासन कार्यालय मोरङले लगाएको कर्फ्यु अझै जारी रहेको हो ।
लेटाङ नगरपालिका वडा नम्बर ५ मा रहेको शिक्षा विकास माविका शिक्षकले विद्यार्थीमाथि यौन दुर्व्यवहारको विषयलाई लिएर आइतबार साँझ स्थानीयको आक्रमणबाट एक प्रहरी जवानको ज्यान गएको थियो । स्थानीयको चक्कु प्रहारबाट प्रहरी जवान उर्मिला श्रेष्ठको ज्यान गएपछि स्थितीलाई नियन्त्रणमा लिन कर्फ्यु लगाएको थियो ।
विद्यालयकै शिक्षक मनोज पौडेलले कक्षा ७ मा अध्ययनरत १४ वर्षीय विद्यार्थीलाई यौन दुर्व्यवहार गरेको विरोधमा प्रहरी र स्थानीयवासी झडप भएको थियो । अहिले त्यस क्षेत्रमा कर्फ्यु जारी छ । सोमबार बिहान ७ बजेदेखि लागेको कर्फ्यु अझै फुकुवा हुन सकेको छैन । मोरङका प्रमुख जिल्ला अधिकारी काशीराज दाहालले अवस्था सामान्य उन्मुख हुँदै गएको अवस्थामा कर्फ्यु हट्न सक्ने बताए ।
जिल्ला प्रहरी कार्यालय मोरङका प्रहरी उपरीक्षक जनार्दन जिसीले आज बस्ने सर्वदलीय बैठकपछि दलहरूको सहजीकरणमा कर्फ्यु हट्न सक्ने बताए । लेटाङमै आज दिउँसो सर्वदलीय बैठक बोलाइएको छ । सर्वदलीय बैठकपछि अवस्थालाई सामान्य बनाउने प्रयास हुने बताइएको छ ।
मोरङ प्रशासनले बिहान ७ बजेदेखि लागु हुने गरी वडा नम्बर ५ को सबै क्षेत्र, वडा नम्बर ३ र ४ को गंगेपुर र कमलपुर क्षेत्र, वडा नम्बर ६ को वडा कार्यालय क्षेत्र, पूर्वमा मोरङ्गे खोला र पश्चिममा चिसाङ खोला क्षेत्रसम्मलाई कर्फ्यु लगाएको हो । लेटाङ घटनामा संलग्न रहेको आरोपमा ८ जनालाई नियन्त्रणमा लिएको प्रहरीले जनाएको छ ।
