काठमाडौं । एमाले वरिष्ठ नेता माधव नेपालसहित चार जना नेताहरुले सर्वोच्चमा दायर गरेको रिट न्यायाधीश प्रकाश ढुंगानाको एकल इजलासमा पेशी तोकिएको छ ।
वैशाख ९ गते नेता नेपालसहित भीम रावल, घनश्याम भुसाल र सुरेन्द्र पाण्डेले ओली पक्षले एकलौटी रुपमा गरेका निर्णय खारेजीको माग गर्दै रिट दिनुभएको थियो ।
नेताहरुले निर्वाचन आयोग, प्रधानमन्त्रीसमेत रहेका पार्टी अध्यक्ष केपी शर्मा ओली, सभामुख अग्निप्रसाद सापकोटा र महासचिव ईश्वर पोखरेललाई विपक्षी बनाएका छन् ।
निवेदनमा एमाले नेता माधवकुमार नेपाल र झलनाथ खनाल पक्षले आफूहरुको सहभागिता बिना ओली पक्षले फागुन २८, चैत्र ७ र वैशाख ६ गते गरिएका भनिएका पार्टी विधान विपरीत निर्णयहरु रोक्न माग गरेका छन् ।
विधान विपरीत महाधिवेशनबाट निर्वाचित केन्द्रीय कमिटीलाई खारेज गरेर महाधिवेशन आयोजक कमिटी बनाएको, आफू पक्षीय १४ जना पदाधिकारी खारेज गरेको, पार्टी सदस्यता नलिएकालाई अचानक केन्द्रीय कमिटी सदस्य बनाएको, विधान अधिवेशन नगरी विधान संशोधन गरेकाले त्यसलाई बदर गर्न रिट निवेदनमा माग गरिएको छ ।
उनीहरुले पार्टीलाई सर्वोच्चको आदेशअनुसार फागुन २३ गते एमाले पुनर्जिवित हुँदाको अवस्थामा फर्काउन र २७ सांसदमाथि गर्न लागिएको कारबाही रोक्न माग गरेका छन् ।
